Сталі вядомыя лідары конкурснага праекта “Дажыначны сноп 2021” у Шуміліне

Кожны раён Віцебшчыны ў межах абласнога фестывалю-кірмашу працаўнікоў вёскі «Дажынкі – 2021» прадставіў свой найлепшы снапок на выставе, арганізаванай у фае шумілінскага Дома культуры. Крэатыўны падыход і фантазія майстроў раённых дамоў і цэнтраў рамёстваў паражалі. Уявіце сабе снапок, на вяршыні якога размясцілася саломнае сэрца. Унутры яго ўсіх вітаюць пляценыя лялькі ў нацыянальных касцюмах: мужчына трымае колас, а жанчына – каравай. Крыху ніжэй саломныя чалавечкі водзяць карагод, нібы святкуючы свае, лялечныя «Дажынкі».

Нельга не звярнуць увагу на снапок, увянчаны камбайнам, а таксама на кампазіцыю ў выглядзе вялізнага букета з залатых коласаў, упрыгожаную васількамі і стужкамі з нацыянальным арнаментам. Вылучаўся арыгінальнасцю і снапок, на вяршыні якога знаходзілася стародаўняя млын.

Як адзначылі ў Віцебскім абласным метадычным цэнтры народнай творчасці, які разам з упраўленнем культуры аблвыканкама выступіў арганізатарам конкурснага праекта, усе раёны падышлі да задання вельмі творча, таму вызначыць пераможцу было няпроста. Для гэтага гасцям і ўдзельнікам свята, наведвальнікам выставы было прапанавана прагаласаваць за кампазіцыю, якая спадабалася, жэтонам. Такім спосабам у выбары лепшага снапа прынялі ўдзел больш за 400 чалавек. І трэба сказаць, іх меркаванні не адрозніваліся аднадушнасцю. У выніку перамогу святкавалі адразу 10 раёнаў. Гэта Браслаўскі, Гарадоцкі, Дубровенскі, Лёзненскі, Мёрскі, Полацкі, Пастаўскі, Расонскі, Шаркаўшчынскі і Шумілінскі. Усе астатнія рэгіёны падзялілі паміж сабой другое і трэцяе месца!

"Віцебскія весці".