Ставіць высокія мэты на будучыню Беларусі дазваляе стабільнасць і нацэленасць на стварэнне - дэпутат

7 снежня, Віцебск /Вольга Багачова - БЕЛТА/. Ставіць высокія мэты на будучыню Беларусі дазваляюць стабільнасць эканомікі і нацэленасць на стварэнне. Такое меркаванне выказала карэспандэнту БЕЛТА старшыня Віцебскай абласной арганізацыі Беларускага таварыства Чырвонага Крыжа (БТЧК), дэпутат Віцебскага абласнога Савета дэпутатаў, член абласной арганізацыі Беларускага саюза жанчын Галіна Жаланава. "У адрозненне ад калег з іншых краін я працую ў спакойнай краіне, дзе няма ўзброеных канфліктаў, няма сваіх бежанцаў. У нас гэты статус носяць толькі людзі, якія выбралі Беларусь сваім новым пастаянным месцам жыхарства і прыехалі з краін з неспакойнай палітычнай абстаноўкай. Гэта вельмі паказальна", - падкрэсліла Галіна Жаланава. Яна адзначыла, што захаваныя ў няпростых умовах мір і стабільнасць даюць краіне магчымасць працаваць над стваральнымі пытаннямі. На думку суразмоўніцы, найбольш ярка гэта адлюстроўвае праграма сацыяльна-эканамічнага развіцця Беларусі на 2011-2015 гады. Чырвонай ніткай праз усе палажэнні, намечаныя ў іх мэты, праходзіць клопат аб простым чалавеку, росце дабрабыту ўсяго беларускага народа, а галоўным прыярытэтам вызначана сям'я. Сумленная дзяржаўная падтрымка інстытута сям'і ўжо праводзіцца ў Беларусі: эфектыўна працуюць праграмы па дэмаграфічнай бяспецы, "Дзеці Беларусі", шматдзетным бацькам выдзяляюцца льготы на жыллё. Далейшае павелічэнне дапамогі пры нараджэнні дзіцяці, магчымасць атрымання бясплатнага жылля з'яўленнем чацвёртага малога стануць крокам, які абавязкова ацэняць як маладыя, так і шматдзетныя сем'і. Важны блок тэм, закранутых кіраўніком дзяржавы на IV Усебеларускім народным сходзе, датычыўся здароўя, перааснашчэння ўсіх лячэбных устаноў краіны, развіцця малых гарадоў. "Каб вырашыць усе гэтыя пытанні, вядома, неабходна развіваць эканоміку, бо з паветра грошы не бяруцца. Таму правільна стаўка робіцца на новыя тэхналогіі, інавацыі, а таксама трэба працаваць і адказна, дысцыплінавана падыходзіць да сваіх абавязкаў", - заключыла Галіна Жаланава.-0-