Сценічны жывапіс полацкага Спаса-Праабражэнскага храма будзе прадстаўлены на музейнай выставе

У Мастацкай галерэі Нацыянальнага Полацкага гісторыка-культурнага музея-запаведніка 12 верасня адкрываецца ўнікальная выстава сценапісу, знятага са сцен Спаса-Праабражэнскага храма ў Полацку, – паведамляе БЕЛТА.

Музейная выстава "Сценапіс XII-XIX стст. Спаса-Праабражэнскага храма" – гэта своеасаблівы вынік праведзеных рэстаўрацыйных работ, мэтай якіх было адкрыццё фрэскавага жывапісу XII стагоддзя і захаванне некалькіх слаёў алейнага жывапісу XVIII-XIX стагоддзяў у храме Спаса-Еўфрасіннеўскага манастыра ў Полацку.

"Выстава дэманструе ўпершыню прыменены ў маштабах цэльнага комплексу навукова распрацаваны тэхналагічны працэс па расслаенні і кансервацыі шматслаёвага насценнага жывапісу, выкананага ў розныя стагоддзі. Кожны міліметр фрэсак быў адкрыты з-пад некалькіх слаёў алейнага жывапісу, ачышчаны ад пылу і сажы, апрацаваны спецыяльным замацавальным складам і сёння ўпрыгожвае сцены дзеючага храма манастыра. Знятыя са сцен і музеефікаваныя адслоенні алейнага жывапісу XVIII-XIX стагоддзяў дазваляюць прадставіць у поўным аб'ёме гістарычную і культурную каштоўнасць унікальнага помніка архітэктуры і жывапісу – Спаса-Праабражэнскага храма Спаса-Еўфрасіннеўскага манастыра ў Полацку", – адзначылі ў Мастацкай галерэі.

Выстава сценапісу створана дзякуючы гранту Фонду Прэзідэнта Рэспублікі Беларусь па падтрымцы культуры і мастацтва і з'яўляецца вынікам шматгадовай працы вучоных, рэстаўратараў і музейных супрацоўнікаў.

Спаса-Праабражэнская царква Спаса-Еўфрасіннеўскага манастыра па праву лічыцца жамчужынай усходнеславянскай архітэктуры. Паводле падання, царква была пабудавана з благаславення Еўфрасінні Полацкай – ігуменні Полацкага манастыра, і, як мяркуюць эксперты, задум роспісу таксама належыць ёй.