Стыльную, экалагічную і якая выступае за здаровы лад жыцця аграэкасядзібу абяруць у Віцебскай вобласці

9 снежня, Віцебск /Дзіяна Курыла - БЕЛТА/. Гасцінную, стыльную, экалагічную і тую, што выступае за здаровы лад жыцця аграэкасядзібу выберуць у Віцебскай вобласці. Віцебскі аблвыканкам сумесна з ААТ "Белаграпрамбанк" і грамадскім аб'яднаннем "Адпачынак у вёсцы" абвясціў рэгіянальны конкурс "Лепшая аграэкасядзіба года Віцебскай вобласці", паведаміў карэспандэнту БЕЛТА намеснік начальніка ўпраўлення фізічнай культуры, спорту і турызму аблвыканкама Канстанцін Вагулкін. Вызначэнне пераможцаў адбудзецца па пяці намінацыях: захаванне беларускіх традыцый, здаровы лад жыцця, гасціннасць, зялёная сядзіба, стыль і гармонія. Акрамя апісальных матэрыялаў, электронных прэзентацый і рэкламных брашур намінантам неабходна будзе прадставіць і дакументы, што пацвярджаюць колькасныя паказчыкі работы. На працягу студзеня члены журы конкурсу на месцах азнаёмяцца з работай прэтэндэнтаў на званне лепшай аграэкасядзібы. Як чакаецца, вынікі конкурсу будуць падведзены ў пачатку лютага 2010 года. Пераможцаў чакаюць дыпломы, прызы ад спонсараў і ўдзел у аналагічным рэспубліканскім конкурсе. Па словах Канстанціна Вагулкіна, цяпер у вобласці зарэгістраваны больш за 200 суб'ектаў аграэкатурызму - сялянскіх фермерскіх гаспадарак, фізічных асоб, якія ажыццяўляюць дзейнасць у сферы аказання туруслуг.-0-