Сталічныя інвестары плануюць адрадзіць ваенны гарадок у Глыбоцкім раёне і запусціць міні-ГЭС на Пастаўшчыне
Гэту маёмасць інвестары набылі на розных аўкцыённых пляцоўках у абласным цэнтры. Былы ваенны гарадок у Падсвіллі перададзены ў раённую камунальную ўласнасць і выстаўляўся на таргі з красавіка 2018 года. Маёмасны комплекс займае 40 га і ўключае больш за 200 аб'ектаў, у тым ліку 38 будынкаў і збудаванняў рознага функцыянальнага прызначэння агульнай плошчай звыш 10,1 тыс. кв. м, 27 рэзервуараў, у тым ліку заглыбленых, сумарнай ёмістасцю амаль 30,8 тыс. куб. м. Такое гаспадарка дасталася ТАА «Лясная сэрвісная кампанія» з Мінскага раёна. Арганізацыя спецыялізуецца на лесанарыхтоўках. Па словах яе прадстаўніка, прапрацоўваючы пытанне дыверсіфікацыі бізнесу, кампанія звярнула ўвагу на Падсвілле, дзе выявіла магчымасці для вытворчай дзейнасці па некалькіх напрамках.
Для асваення тэрыторыі флагманскім праектам выбрана вытворчасць брыкетаў PiniKay – гэта паліва з прэсаваных драўняных адходаў. Тэрыторыя былога ваеннага гарадка цалкам задавальняе патрабаванням, якія неабходна ўлічыць пры арганізацыі выпуску прадукту, продажы якога маюць да таго ж сезонны характар.
Брыкеты ўяўляюць сабой акуратныя шматгранныя брускі з унутранай адтулінай, што палягчае іх распальванне і актыўнае гарэнне. Прадукт непатрабавальны да сыравіны, карыстаецца ўстойлівым попытам пры невысокім узроўні канкурэнцыі на беларускім рынку. На першапачатковым этапе аб'ём інвестыцый складзе не менш за 280 тыс. еўра, прадугледжваецца стварыць як мінімум 50 працоўных месцаў. Пры аператыўным вырашэнні арганізацыйных пытанняў запусціць абсталяванне плануецца ў другім паўгоддзі 2020-га.
Для максімальна поўнага выкарыстання патэнцыялу тэрыторыі кампанія мае намер адкрыць яшчэ некалькі вытворчасцей. Адразу пасля афармлення здзелкі інвестар збіраецца ўсталяваць эксперыментальную печ для адточвання тэхналогіі атрымання драўнянага вугалю. Гэта прадукт з больш высокім дабаўленым коштам, запатрабаваны ў тым ліку ў металургічнай галіне, а сыравінай для яго вытворчасці з'яўляецца брыкет PiniKay. Акрамя таго, прапрацоўваюцца варыянты арганізацыі дзейнасці па ўтылізацыі нафтазмяшчальных адходаў, а таксама ў адным з напрамкаў аграпрамысловай сферы.
Для рэалізацыі праекта ў Пастаўскім раёне сталічныя інвестары зарэгістравалі юрыдычную асобу ў Шуміліне. Гэта невыпадкова: па словах прадстаўніка кампаніі, нароўні з адраджэннем міні-ГЭС на рацэ Заражанка на ўсход ад вёскі Алешына яны разглядаюць магчымасць удзелу яшчэ ў трох праектах у сферы гідраэнергетыкі на тэрыторыі Віцебскай вобласці.
Стымулам да актывізацыі інвестыцыйнай дзейнасці ў зялёнай энергетыцы стаў падпісаны нядаўна Указ №357 «Аб аднаўляльных крыніцах энергіі», які накіраваны на збалансаванае развіццё ўсіх відаў генерацыі электраэнергіі з улікам уводу ў эксплуатацыю Беларускай АЭС.
На міні-ГЭС «Алешына» інвестар плануе цалкам замяніць абсталяванне, адрамантаваць будынак, пасля чаго запусціць станцыю ў эксплуатацыю. Наступным этапам у рэалізацыі праекта стане арганізацыя вытворчай дзейнасці, пры якой будзе выкарыстоўвацца электраэнергія, што выпрацоўваецца на міні-ГЭС.