Будаўніцтва паліклінікі на Юг-7 у Віцебску набліжаецца да завяршэння, у студзені 2019 года паступіць медыцынскае абсталяванне
Да 22 снежня будаўнікі плануюць завяршыць унутранае аздабленне кабінетаў, калідораў і ліквідаваць недахопы, выяўленыя спецыялістамі, якія будуць працаваць у гэтым будынку. Да ўказанай даты ўсе медыцынскія кабінеты павінны быць гатовыя да ўстаноўкі абсталявання, на гэтым зрабіў акцэнт старшыня гарвыканкама. Зрэшты, Віктар Мікалайкін, наведаўшы аб'ект, адзначыў, што задаволены ходам будаўніцтва: ужо цяпер паліклініка ацяпляецца, усе камунікацыі працуюць бесперабойна, на стадыі дапрацоўкі з дзевяці паверхаў, уключаючы цокальны, – толькі другі, дзе ў фасаде будынка пакінуты тэхнічны праём, праз які будзе загружацца буйнагабарытнае медыцынскае абсталяванне.
Галоўны інжынер ААТ «Будаўнічы трэст №9, г. Віцебск» Юрый Балашков расказаў, што будаўніцтва ідзе з невялікім апярэджаннем дзякуючы рытмічнаму фінансаванню і адсутнасці затрымак у пастаўках будматэрыялаў.
Каб укласціся ў пазначаныя тэрміны, з пачатку 2018-га давялося фарсіраваць будаўнічыя работы
Замест двух выкарыстоўвалі адразу тры вежавых краны, якія былі занятыя на ўзвядзенні некалькіх карпусоў адначасова.
Амаль 300 чалавек працавалі ў тры змены шэсць дзён на тыдзень, а пасля завяршэння фасада – і па нядзелях, займаючыся ўнутраным аздабленнем. Цяпер на аб'екце крыху больш за 160 будаўнікоў. Што тычыцца добраўпарадкавання прылеглай тэрыторыі, то яно ўжо скончана, і ўтульны дворык упрыгожвае невялікі фантан.
У студзені наступнага года, праінфармаваў галоўны ўрач Віцебскай гарадской цэнтральнай паліклінікі Станіслаў Цітовіч, завершыцца пастаўка абсталявання, за люты спецыялісты правядуць яго наладку. Да таго часу будуць падрыхтаваны да працы новыя кабінеты, каб да канца першага квартала 2019-га ўстанова аховы здароўя змагла прыняць першых пацыентаў.
Віктар Мікалайкін падкрэсліў, што дадзены аб'ект з'яўляецца значным для горада.
– Гэта паўнавартасны паліклінічны комплекс, які будзе абслугоўваць жыхароў прылеглых мікрараёнаў, а паколькі ўстанова аховы здароўя з'яўляецца гарадской цэнтральнай паліклінікай, сюды могуць накіроўваць віцябчан для дыягнастычных абследаванняў, – расказаў ён. – Тут будзе функцыянаваць сучаснае абсталяванне, частка якога набыта за мяжой. Да прыкладу, тамограф закупілі ў Японіі, а вось маммограф і некаторае іншае абсталяванне – айчыннай вытворчасці.
Гэта будзе першая ў краіне гарадская паліклініка, дзе праводзіцца КТ-абследаванне
У Віцебску камп'ютэрны тамограф паліклінікі будзе пятым, да гэтага яны ўсталёўваліся ў буйных бальніцах і дыягнастычным цэнтры.
Установа аховы здароўя разлічана на 1500 наведванняў за змену, акрамя тэрапеўтычных участкаў, тут будуць стаматалагічнае, у тым ліку хірургічнае дадзенага профілю, педыятрычнае і аддзяленне фізіятэрапіі, а таксама жаночая кансультацыя і басейн для рэабілітацыйных водных працэдур. Другі паверх будзе адведзены для дыягнастычных абследаванняў: рэнтген, ЭКГ, УГД і інш.
Медыцынскія работнікі змогуць праводзіць розныя канферэнцыі і трэнінгі ў прасторнай актавай зале, што будзе спрыяць навуковай інтэграцыі і зробіць паліклініку прывабнай базай для абмену перадавым вопытам спецыялістаў сферы аховы здароўя.
Для будучых медыкаў тут прадугледжаны навучальныя кабінеты і ардынатарскія. Для зручнасці пацыентаў будзе дзейнічаць запіс па электроннай чарзе разам з традыцыйным зваротам у рэгістратуру асабіста і па тэлефоне.
Віктар Мікалайкін таксама адзначыў, што ўзвядзенне дадзенага аб'екта мае яшчэ адзін станоўчы бок: будуць разгружаны другая, трэцяя гарадскія паліклінікі і абласны дзіцячы клінічны цэнтр. Жыхары мікрараёнаў Білева, Поўдзень і Медцэнтр змогуць атрымліваць медыцынскую дапамогу і кансультацыі спецыялістаў у больш камфортных умовах.