Студыя эстраднай песні «ФОРУМ» заняла 6 прызавых месцаў на фестывалі «TALENT SHOW».

Узорная студыя эстраднай песні «ФОРУМ» ДУ «Цэнтр культуры «ВІЦЕБСК» – з разраду тых калектываў, якія ні на дзень не спыняюць сваю творчую дзейнасць. І што вельмі важна – у напружаным графіку студыі заўсёды знойдзецца месца для паездкі за мяжу і ўдзелу ў міжнародных творчых фестывалях і конкурсах. Для дзяцей такія падарожжы – гэта не толькі спосаб заявіць пра сябе, набрацца досведу выступлення на новых пляцоўках і завязаць творчыя знаёмствы, але і магчымасць адпачыць у дружнай кампаніі і ўбачыць мноства прыгожых мясцін. Вось такі сінтэз прыемнага і карыснага.

На гэты раз «ФОРУМ» адправіўся ў падарожжа разам са сваімі вакальнымі студыямі «ЗВЁЗДАЧКІ» і «ДО-МІ-СОЛЬ». Хлопцы сталі ўдзельнікамі IV Міжнароднага фестывалю «TALENT SHOW», які праходзіў з 14 па 18 красавіка на самым што ні ёсць сапраўдным круізным караблі «ROMANTIKA». Марское падарожжа пачалося ў Рызе, затым карабель «перабраўся» у Стакгольм, і канчатковым пунктам зноў стала сталіца Латвіі. Круіз уключаў у сябе забаўляльныя і навучальныя мерапрыемствы на караблі (майстар-класы, дыскатэкі, і г.д.), экскурсіі па Рызе і Стакгольме і, вядома ж, сам конкурс.

Педагог па вакале Алена ГУЖЭВА і харэограф студыі эстраднай песні «ФОРУМ» Аксана ПАЛАСЮК адзначылі, што «TALENT SHOW» – гэта фестываль еўрапейскага фармату, паколькі да ўдзелу запрашаюцца нават дзеці з абмежаванымі магчымасцямі. Жанравая разнастайнасць конкурсных намінацый – вакал, харавое спяванне, харэаграфія, інструментальная музыка, арыгінальны жанр (цырк, тэатр, мастацкае чытанне і г.д.), дызайн адзення – дазваляе кожнаму дзіцяці праявіць свой талент.

Віцебскія салісты былі заяўлены ў вакальнай намінацыі ва ўсіх узроставых катэгорыях – малодшай, сярэдняй і сталай, пры гэтым для кожнай катэгорыі прадугледжаны як сольныя выступленні (конкурс салістаў), так і калектыўныя (конкурс вакальных калектываў). Па меркаванні ўдзельнікаў можна было выканаць на выбар эстрадную, народную, класічную або джазавую кампазіцыю.

Студыя «ФОРУМ» ніколі не з'язджала без узнагарод, і «TALENT SHOW» таксама быў пакараны нашымі хлопцамі. Спецыяльныя прызы атрымалі Уладзіслава БУРУНОВА, Ева КЛЮЕВА, Марыя ЛЕПШЕНКАВА, Максім АРЛОЎСКІ, Дзяніс і Мікіта ТІВА. Трэцяе месца занялі Яўгенія ДАРОЖКІНА, Аліна ЧАРНОЎСКАЯ, а таксама вакальныя студыі «ЗВЁЗДАЧКІ» і «ДО-МІ-СОЛЬ»; другое месца заваяваў Сяргей КУХАРЭНКА, і нарэшце, пераможнае першае месца ў узроставай катэгорыі 8-9 гадоў з беларускай народнай песняй «ОЙ, ВЯСНА» ўзяла Вераніка ЮХНАВЕЦ.

Кіраўнік студыі эстраднай песні «ФОРУМ» Таццяна КІРЫЛАВА адзначыла, што пасля ХХIII Міжнароднага фестывалю мастацтваў «СЛАВЯНСКІ БАЗАР У ВІЦЕБСКУ», дзе калектыў будзе не раз з'яўляцца на сцэне разам з зоркамі эстрады, запланавана ўдзел у новым праекце –
VI Міжнародным фестывалі дзіцячай і моладзевай творчасці «БАЛТЫЙСКІ ВОЯЖ».

Вось такія актыўныя і таленавітыя дзеці растуць у «ФОРУМЕ»!