Супрэматычны роспіс «Смерць шпалерам» вярнуўся на сцяну дома ў цэнтры Віцебска

У Віцебску маладыя мастакі размалявалі сцяну будынка па эскізе Казіміра Малевіча, паведамляе карэспандэнт БЕЛТА.

Супрэматычны роспіс вярнуўся на адрамантаваны будынак па вуліцы Леніна, 18. Гэта ўжо трэцяе нанясенне знакамітага эскіза "Смерць шпалерам" на сцяну дома. Сам малюнак быў створаны Малевічам у 1919 годзе для афармлення будынка майстэрні па вуліцы Бухарынскай, 10 (цяпер вуліца Праўды, 5а).

Як паведамілі карэспандэнту БЕЛТА ў музеі "Віцебскі цэнтр сучаснага мастацтва", першая спроба ўвасобіць у жыццё задумку Малевіча адбылася ў 1992 годзе. Члены творчага аб'яднання мастакоў Віцебска "Квадрат" нанеслі малюнак Малевіча на сцяну будынка, размешчанага на скрыжаванні вуліцы Леніна і вуліцы Праўды. Гэта не той дом, які хацеў аформіць сам Малевіч, але ён таксама захаваўся ў Віцебску з часоў УНОВІСа (авангарднага мастацкага аб'яднання, створанага Казімірам Малевічам) і размешчаны ў непасрэднай блізкасці ад майстэрні, дзе працаваў праслаўлены мастак.

Роспіс быў выкананы нестойкім матэрыялам (гуаш з клеем) і паступова сцёрся са сцяны. У 2010 годзе мастакі А.Духоўнікаў, А.Вышка, Е.Чуйкова і студэнты мастацкіх факультэтаў віцебскіх ВНУ зноў размалявалі сцяну вуглавога будынка. І вось цяпер пасля рамонту малюнак трэці раз упрыгожыў цэнтральную частку горада. У мастацкай акцыі прынялі ўдзел студэнты кафедры дызайну Віцебскага дзяржаўнага тэхналагічнага ўніверсітэта і ВДУ імя Машэрава, маладыя віцебскія мастакі. "Роспіс тарца будынка па вуліцы Леніна, 18 па эскізе Казіміра Малевіча з'яўляецца часткай гісторыі горада. Улічваючы, што ў цяперашні час вядзецца рэстаўрацыя дома па вуліцы Праўды, 5а для размяшчэння ў ім музея гісторыі Віцебскага народнага мастацкага вучылішча, малюнак створыць адзіную з музеем прастору, якая прыцягвае турыстаў і з'яўляецца адным з брэндаў Віцебска", - падкрэслілі ў музеі.

Алена Ціханава