Сувеніры за лісты будуць раздаваць паштавікі Віцебскай вобласці 23 студзеня

Могу паспрачацца, што большасць з нас нават не ўспомняць, калі адпраўлялі ліст, напісаны ўручную. Усё часцей пасланні прыходзяць электроннай поштай, а калі і ў канверце, то надрукаваныя на камп'ютары, дзе роўныя радкі хаваюць эмоцыі, ад хвалявання не скачуць літары, дзе не відаць слядоў ад слёз ці шакаладу. Усё чыста. А шкада! Ностальгія па тых часах, калі эпісталярны жанр быў у пашане і карэспандэнцыю атрымлівалі практычна штодня, калі радкі «радаваліся» ці «зліліся», калі яны былі жывымі, у век камп'ютарных тэкстаў, смс-паведамленняў адчуваецца асабліва востра. Але ўсё залежыць ад нас саміх, бо вярнуць у сваё жыццё рукапісныя пасланні проста. Адправіць вестачку родным ці сябрам можна ў Дзень ручнога пісьма, які ва ўсім свеце адзначаецца 23 студзеня. Асацыяцыя вытворцаў пісьмовых прыналежнасцяў, якая з'яўляецца заснавальнікам свята, выбрала дату невыпадкова: у гэты дзень нарадзіўся Джон Хэнкок, які першым падпісаў Дэкларацыю незалежнасці ЗША.

Супрацоўнікі Віцебскага філіяла РУП «Белпошта» вырашылі падтрымаць тых, хто цэніць напісанае ад рукі слова. Так, у аддзяленнях паштовай сувязі Віцебск-15 (пр-т Маскоўскі, д.10), у Глыбокае-3 ( вул. Леніна, д.8), Арша-11 ( вул.Леніна, д.46), Полацк-16 ( вул.Багдановіча, д.10), Паставы-3 (пл.Леніна, д.16), Наваполацк-6 ( вул.Маладзёжная, д.74) кожны, хто адправіць ліст 23 студзеня з 13 да 16 гадзін, атрымае ў падарунак памятны сувенір.

Алена Пятрова, "Віцебскія весці"