Святар з Верхнядзвінскага раёна ўдастоены прэзідэнцкай прэміі «За духоўнае адраджэнне»

Кіраўнік дзяржавы напярэдадні Новага года падпісаў указ аб прысуджэнні прэміі Прэзідэнта Рэспублікі Беларусь «За духоўнае адраджэнне». Як паведамляе прэс-служба Аляксандра Лукашэнкі, па выніках 2015-га прысуджаны пяць такіх высокіх узнагарод.

Прыемна адзначыць, што сярод лаўрэатаў – пробашч парафіі Святой Тройцы ў вёсцы Росіца Верхнядзвінскага раёна Віцебскай дыяцэзіі Рымска-каталіцкага касцёла ў Беларусі Часлаў Курэчка.

Прэмія айцу Чаславу ўручана «за важкі ўклад у захаванне міжканфесійнага міру і нацыянальнай згоды, а таксама актыўны ўдзел у духоўна-асветніцкай дзейнасці краіны і прапагандзе здаровага ладу жыцця, што атрымала шырокае прызнанне ў грамадстве».

Нагадаем, летась пробашч касцёла ў Росіцы стаў лаўрэатам ганаровага звання «Чалавек года Віцебшчыны». Дзякуючы намаганням святара парафія Святой Тройцы атрымала новае жыццё, пераўтварылася тэрыторыя вакол касцёла, дзе растуць сотні гатункаў кветак і кустоўяў, добраўпарадкаваны возера і каталіцкія могілкі, з'явіліся сажалкі з каванымі масткамі, адрадзілася сама Росіца, якую цяпер актыўна наведваюць і пілігрымы, і турысты з розных куткоў Беларусі і іншых краін. Бачачы старанні ксяндза, да рэалізацыі яго ідэй далучылася мясцовая ўлада.

Шмат зроблена агульнымі намаганнямі, у тым ліку і новая асфальтаваная дарога да вёскі. Рэдакцыя нашай газеты далучаецца да віншаванняў, якія гучаць на адрас пробашча касцёла ў Росіцы, і жадае яму моцнага здароўя для ажыццяўлення ўсіх планаў па далейшым адраджэнні парафіі і населенага пункта.

Вольга Маслоўская, «Віцебскія весці».