Вольны час дзяцей павінен быць максімальна запоўнены - пракуратура
Свабодны час дзяцей павінен быць максімальна заняты карыснымі справамі. Такое меркаванне выказаў старшы памочнік пракурора вобласці па наглядзе за выкананнем заканадаўства аб непаўналетніх і моладзі Антон Волкаў.
"Занятасць - адзін з асноўных фактараў папярэджання падлеткавай злачыннасці. Таму свабодны час дзяцей павінен быць максімальна запоўнены карыснымі справамі", - перакананы Антон Волкаў. На яго думку, увядзенне бясплатнага праезду ў гарадскім грамадскім транспарце для дзяцей, якія дабіраюцца да ўстаноў дадатковай адукацыі, паспрыяе карыснай занятасці непаўналетніх.
"Акрамя іншага, гэта рэальная дапамога і падтрымка для сем'яў, у якіх выхоўваюцца дзеці", - дадаў ён. "Гаворка ідзе аб спартыўных трэніроўках, наведванні гурткоў па ДПМ, тэхнічнай творчасці, удзеле ў мерапрыемствах, якія праводзяцца ў Палацах творчасці, спартыўных школах і г.д. На дадатковых занятках дзеці атрымліваюць новыя веды, развіваюць свае таленты. І калі для прыкладу ўзяць шматдзетную сям'ю, то бацькам, якія імкнуцца заняць дзяцей карыснымі справамі, неабходна выдаткаваць на праезд істотную суму. Актуальная гэтая праблема для няпоўных і малазабяспечаных сем'яў", - адзначыў Антон Волкаў.
Прымаючы пад увагу ўсе гэтыя абставіны, пракуратура вобласці прапанавала Віцебскаму аблвыканкаму даць права дзецям ездзіць у гарадскім грамадскім транспарце бясплатна. Ініцыятыва знайшла разуменне. Органы мясцовай улады прынялі меры па дадатковай сацыяльнай падтрымцы навучэнцаў. Цяпер у многіх установах адукацыі ёсць спецыяльныя камісіі па бясплатным праездзе, куды пры наяўнасці падстаў (шматдзетныя, малазабяспечаныя, няпоўныя сем'і і інш.) могуць звяртацца бацькі. У некаторых рэгіёнах спецыяльна для дзяцей закупляюцца праязныя білеты, іншыя ўвялі бясплатны праезд для ўсіх школьнікаў.
Як паведамлялася, прынята адпаведнае рашэнне і на ўзроўні вобласці. На сесіі абласнога Савета дэпутаты пастанавілі, што навучэнцы рэгіёну з 1 верасня 2018 года атрымаюць права бясплатнага праезду ў гарадскім грамадскім транспарце не толькі ў школу, але і на дадатковыя
заняткі. Права на бясплатны праезд ва ўстановы дадатковай адукацыі, мастацкія, музычныя школы, на заняткі спартыўных секцый і розных гурткоў прадастаўляецца навучэнцам устаноў агульнай сярэдняй і спецыяльнай адукацыі, размешчаных на тэрыторыі Віцебскай вобласці. Вырашана, што дзеці змогуць з 1 верасня па 30 чэрвеня бясплатна ездзіць на гарадскіх аўтобусах (акрамя экспрэсных маршрутаў), а таксама на гарадскім электрычным транспарце. Права рэалізуецца навучэнцамі на падставе даведкі. Дадатковыя меры па сацыяльнай падтрымцы навучэнцаў прыняты на падставе закона "Аб мясцовым кіраванні і самакіраванні ў Рэспубліцы Беларусь" і пастановы Савета Міністраў ад 16 лютага 2011 года №202 "Аб некаторых пытаннях праезду навучэнцаў".