Больш за 300 назіральнікаў акрэдытаваны ў Віцебскай вобласці для маніторынгу выбараў

16 красавіка, Віцебск /Дзіяна Курыло - БЕЛТА/. Звыш 300 назіральнікаў акрэдытаваны выбарчымі камісіямі для маніторынгу выбараў дэпутатаў мясцовых саветаў у Віцебскай вобласці, паведаміў карэспандэнту БЕЛТА старшыня абласной выбарчай камісіі Уладзімір Мядзялец. Каля паловы назіральнікаў будуць працаваць на ўчастках для галасавання, астатнія - у акруговых і тэрытарыяльных камісіях. Працоўныя калектывы вылучылі 128 назіральнікаў, 30 назіральнікаў з'яўляюцца самавылучэнцамі, астатнія прадстаўляюць грамадскія аб'яднанні і партыі. Прычым актыўнасць праявіла толькі КПБ, вылучыўшы 4 назіральнікаў. Перадвыбарная кампанія праходзіць у вобласці ў поўнай адпаведнасці з Выбарчым кодэксам Беларусі і каляндарным планам арганізацыйных мерапрыемстваў, зацверджаным Цэнтрвыбаркамам. Кандыдаты ў дэпутаты мясцовых саветаў праводзяць агітацыйныя сустрэчы з выбаршчыкамі, выступаюць па графіку ў эфіры мясцовага радыё. Па замове аблвыбаркама выраблена больш за 950 тыс. паведамленняў аб часе і месцы галасавання, якія ўжо перададзены выбаршчыкам. У Віцебскай вобласці зарэгістраваны 3,7 тыс. кандыдатаў у дэпутаты. Цяпер у вобласці ідзе перадвыбарная агітацыя. Прэтэндэнты на дэпутацкі мандат выступаюць у эфіры абласнога і мясцовага радыё, сустракаюцца з выбаршчыкамі. У Віцебскай вобласці працуюць 60 акруговых камісій па выбарах дэпутатаў аблсавета, 240 тэрытарыяльных камісій па выбарах дэпутатаў раённых, гарадскіх, сельскіх і пасялковых саветаў. Дэпутацкі корпус 26-га склікання будзе сфарміраваны ў складзе 3530 чалавек, з іх 60 - дэпутаты аблсавета.-0-