Больш за 350 віцяблянаў узялі ўдзел у велакросе ў рамках Еўрапейскага тыдня мабільнасці
Бацькі з дзецьмі, прадстаўнікі працоўных калектываў, навучальных устаноў, адміністрацыі Першамайскага раёна Віцебска і грамадскіх арганізацый праехалі па вуліцах горада, выбраўшы ровар як альтэрнатыву аўтамабілям. Як падкрэсліла намеснік кіраўніка адміністрацыі Першамайскага раёна Віцебска Марына Новіцкая, крос праводзіўся не ў спаборніцкіх мэтах, а для прапаганды здаровага ладу жыцця.
Адным з умоў удзелу ў велакросе было выкананне Правілаў дарожнага руху. Гэта вучыць рухацца па дарозе з максімальнай увагай, каб пазбегнуць ДТЗ. На фінішы пяцікіламетровай дыстанцыі ўдзельнікам акцыі ўручылі памятныя прызы і ўлёткі з заклікам берагчы родны горад і краіну, захоўваць на вуліцах чысціню.
Быў арганізаваны і шэраг іншых мерапрыемстваў. На тэрыторыі гімназіі №7 адкрылі велапаркову. У школах, сярэдніх спецыяльных і вышэйшых навучальных установах Віцебска, у парках культуры і адпачынку адбыліся спартыўныя спаборніцтвы і квесты. Напрыклад, удзельнікі акцыі «Выбірай і рухайся», якая прайшла ў СШ №6, спаборнічалі ў ўменні філігранна кіраваць роварам і гонках на ролікавых каньках.
Марына Навіцкая адзначыла, што ў абласным цэнтры актывізавалася веладарожны рух, і пры будаўніцтве новых мікрараёнаў прадугледжваецца спецыяльная разметка на тратуарах – для пешаходаў і для аматараў пакатацца на двухколавым транспарце. Таксама яна распавяла, што дзякуючы дадзенай ініцыятыве некаторыя кіраўнікі прадпрыемстваў Першамайскага раёна Віцебска хай і на некалькі дзён, але змянілі аўтамабіль на ровар, даказаўшы ўласным прыкладам: рухацца на свежым паветры сапраўды выдатна!
З 2002 года ў рамках Еўрапейскага тыдня мабільнасці праводзяцца розныя мерапрыемствы, якія папулярызуюць экалагічныя віды транспарту, здаровы лад жыцця, новыя тэхналогіі па паляпшэнні ўрбаністычнай прасторы, у тым ліку развіццё інфраструктуры для аматараў велапрагулак.
Віцебшчына актыўна ўдзельнічала ў Еўрапейскім тыдні мабільнасці і міжнароднай акцыі «Дзень без аўтамабіля», якая праходзіла з 16 па 22 верасня. Як паведаміла рэферэнт абласнога камітэта прыродных рэсурсаў і аховы навакольнага асяроддзя Таццяна Ясюліна, тэматычныя мерапрыемствы адбыліся амаль ва ўсіх рэгіёнах Віцебшчыны. Напярэдадні тэрытарыяльныя органы Мінпрыроды распаўсюджвалі інфармацыйныя улёткі на аўтатранспартных прадпрыемствах, АЗС, СТА, у месцах масавага адпачынку, гандлёвых цэнтрах, на прыпыначных пунктах. Ва ўстановах адукацыі, працоўных калектывах прайшлі інфармацыйныя гадзіны і гутаркі «Негатыўны ўплыў транспарту на навакольнае асяроддзе», «Экалагічны аўтамабіль – што гэта?». Для школьнікаў і моладзі былі арганізаваны конкурсы сачыненняў, малюнкаў на асфальце, камп'ютарнай графікі, блокаў «Транспарт будучыні».