Талонная сістэма выканання тэхнікі бяспекі дзейнічае на прадпрыемствах беларускай энергасістэмы
Добры вопыт, які варта ўзяць на заметку. Гэтыя меры, вядома, апраўданы, бо працоўныя будні энергетыкаў звязаны з небяспекай, як і ў многіх іншых сферах вытворчасці. Але толькі ў тым выпадку, калі не выконваць патрабаванні аховы працы. Правілы, якія зробяць працу бяспечнай і захаваюць жыццё і здароўе. Стаўкі высокія, і, тым не менш, адбываюцца выпадкі, калі супрацоўнікі ігнаруюць нормы, упарта не апранаюць каску або не выкарыстоўваюць страховачны пояс. Так, ёсць моманты, калі ў плане арганізацыі аховы працы недапрацоўваюць кіраўнікі, няма належнага кантролю з боку наймальніка. І ўсё ж у большасці выпадкаў вытворчага траўматызму вінаватыя самі работнікі. Міжволі задаешся пытаннем: чаму ж яны так не шануюць уласнае жыццё?
Пра гэта і не толькі ішла размова на семінары-нарадзе «Прафілактычная работа па зніжэнні вытворчага траўматызму ў сельскагаспадарчых арганізацыях Міністэрства энергетыкі», які прайшоў у Полацкім раёне. У ім прынялі ўдзел прадстаўнікі Мінэнерга, Мінпрацы і сацабароны, рэспубліканскага камітэта прафсаюза работнікаў энергетыкі, газавай і паліўнай прамысловасці, а таксама кіраўнікі, галоўныя інжынеры, спецыялісты па ахове працы прадпрыемстваў «Белэнерга».
Усяго ў сістэме восем аграфіліялаў, два з іх у нашай вобласці – філіялы РУП «Віцебскэнерга» «Цеплічны» ў Аршанскім раёне і «Вясна-энерго» ў Полацкім, дзе ўдзельнікі семінара азнаёміліся з арганізацыяй работы па выкананні тэхнікі бяспекі.
Як адзначыў намеснік галоўнага інжынера ДВА «Белэнерга» Валерый Паршнеў, нагодай для сустрэчы стаў выпадак вытворчага траўматызму, які адбыўся некалькі месяцаў таму ў філіяле «Дубрава-агра»
Гомельскай вобласці. Вопытны механізатар стаў устраняць няспраўнасць у жатцы камбайна пры незаглушаным рухавіку, праігнараваўшы элементарныя патрабаванні тэхнікі бяспекі. У выніку застаўся без пэндзля рукі. Следчымі прызнана стапрацэнтная віна ў тым, што здарылася, самога работніка.
У бягучым годзе ў галіне назіраецца рост колькасці
няшчасных выпадкаў, у тым ліку са смяротным зыходам (такіх за 11 месяцаў
6). Валерый Мікалаевіч перакананы: улічваючы, якія сілы і сродкі ў энергетыцы
ўкладваюцца ў арганізацыю аховы працы, такіх сітуацый наогул не павінна быць.
У філіяле «Вясна-энерго» ў гэтым годзе іх і не было. Пытанням выканання тэхнікі бяспекі супрацоўнікамі тут надаецца самае пільную ўвага. Удзельнікі нарады пераканаліся ў гэтым, пабываўшы на малочна-таварным комплексе «Заскоркі». У цэлым у жывёлагадоўлі назіраецца такая тэндэнцыя: чым больш механізаваны працэс вытворчасці малака, тым менш удзел чалавека, а значыць, і рызыкі пашкоджанняў. Механізацыя дазваляе адысці ад траўмавання людзей, ад выплат па хваробе, павышаецца вытворчая дысцыпліна.
Як паведаміў дырэктар філіяла «Вясна-энерго»
Андрэй Нікіфароў, «Заскоркі» сталі аднымі з першых у вобласці, дзе
з'явіліся рабатызаваныя комплексы даення, тут можна ўбачыць самыя
сучасныя тэхналогіі, якія прымяняюцца сёння ў жывёлагадоўлі Беларусі.
І ахова працы наўпрост увязана з тэхналогіямі, дзе мінімізаваны чалавечы
фактар. Зразумела, да персаналу прымяняюцца самыя высокія патрабаванні.
– Увесь комплекс абслугоўваюць 28 чалавек. Пытанні тэхнікі бяспекі на кантролі пастаянна, а раз на год праводзім праверку ведаў персаналу па ахове працы, для гэтага ёсць ліцэнзаваная праграма,
плюс распрацаваны свае білеты. Па выніках – допуск да працы. І, вядома, нашых супрацоўнікаў стымулюе талонная сістэма, ніхто не хоча губляць працоўнае месца з годнай аплатай і ўмовамі працы, – адзначыў Андрэй Анатольевіч.Што тычыцца цяплічнага камбіната, то тут абсталяваны клас па ахове працы, які ўразіў гасцей. Тут размешчаны спецыяльная літаратура, стэнды з інфармацыяй, асноўныя сродкі абароны, у класе праводзяцца заняткі і інструктажы з персаналам. У адміністрацыйным корпусе ў распараджэнні работнікаў душ, раздзявальня, пакой прыёму ежы. У цяпліцах цяпер даглядаюць за агуркамі, якія паступяць на прылаўкі крам да навагодніх святаў, а таксама фасоўка зеляніны.
Дарэчы, калі раней для абароны раслін выкарыстоўвалі сродкі хімізацыі, то зараз толькі біялагічныя, гэта значыць персанал не кантактуе з хімпрэпаратамі і на выхадзе атрымліваецца экалагічна чысты прадукт. Аб мерах бяспекі пры працы ў цяпліцах нагадваюць шматлікія стэнды.
Мабыць, у пытаннях аховы працы дзейнічае закон – інфармацыі шмат не бывае. Чым больш гаварыць пра гэта, тым больш верагоднасць, што чалавек прыслухаецца.
– Правілы тэхнікі бяспекі напісаны даўно, і ўсё ж варта
пастаянна да іх вяртацца, нагадваць людзям аб неабходнасці іх выканання.
Служба аховы працы ў філіялах павінна выяўляць недапрацоўкі і
парушэнні. У гэтым пытанні няма дробязей. На жаль, здараюцца няшчасці, і
яны павінны стаць галоўным урокам для работнікаў, трэба вучыцца на чужых
памылках, – падкрэсліў Валерый Поршнеў.
І пераймаць станоўчы вопыт, перакананы начальнік упраўлення аховы і дзяржаўнай экспертызы ўмоў працы Мінпрацы і сацабароны Іван Карчэўскі, даўшы высокую ацэнку арганізацыі тэхнікі бяспекі на комплексе і ў цяплічным камбінаце.
Вольга МАСЛОЎСКАЯ, фота аўтара. «Віцебскія весці».