Тандэм улады і бізнесу абмяркоўвалі на сустрэчы кіраўніцтва Глыбоцкага раёна з прадстаўнікамі мясцовай бізнес-эліты
Старшыня райвыканкама Аляксандр Шубскі падкрэсліў, што прыватны бізнес займае асаблівае месца ў структуры эканомікі краю, гуляючы значную ролю ў сацыяльным жыцці насельніцтва, спрыяючы фарміраванню канкурэнтнага асяроддзя, развіццю сферы паслуг, стварэнню новых працоўных месцаў.
Толькі ў студзені – чэрвені гэтага года было зарэгістравана 66 новых ІП, усяго ж у раёне іх налічваецца звыш 800. Акрамя гэтага, працуюць 200 суб'ектаў малога прадпрымальніцтва (камерцыйныя арганізацыі з колькасцю да 100 чалавек), у тым ліку прыватнай формы ўласнасці – 158 арганізацый. Сваю прадукцыю прыватныя прадпрыемствы рэалізуюць не толькі на тэрыторыі раёна, вобласці, але і за межамі краіны, паступова пашыраючы геаграфію экспартных паставак.
Дарэчы, удзельная вага паступленняў падаткаў і збораў ад камерцыйных арганізацый, індывідуальных прадпрымальнікаў у мясцовы бюджэт у мінулым годзе склала 27,3%, а ў першым паўгоддзі 2019-га – 25,5%. У большасці выпадкаў яны займаюцца гандлем і аказаннем паслуг, менш суб'ектаў – вытворчай дзейнасцю.
Умацаванне дыялогу паміж уладай і бізнесам – неабходная ўмова для сацыяльна-эканамічнага развіцця азёрнага краю. На пытанне аб далейшых перспектывах Аляксандр Шубскі адказаў, што, як і раней, акцэнт будзе зроблены на прыцягненні ў раён інвестыцый, у тым ліку замежных, павышэнні эфектыўнасці працы сельскагаспадарчых арганізацый, прамысловых прадпрыемстваў. Без увагі не застануцца развіццё прадпрымальніцкай дзейнасці, грамадскія і бытавыя пытанні, напрыклад, пракладка водаправода да аднаго з населеных пунктаў, рамонт даху жылых дамоў, стварэнне спартыўнай пляцоўкі ў гарпасёлку Падсвілле.
Шмат каго хвалюе бяспека дзяцей на дарогах, тым больш гэта актуальна напярэдадні новага навучальнага года. Ці будуць дзеці ўважліва выконваць Правілы дарожнага руху, асабліва там, дзе няма тратуароў або яны маюць патрэбу ў рамонце? Прадпрымальнікі Глыбоччыны, якія неаднаразова прымалі ўдзел у добраўпарадкаванні населеных пунктаў, акцыі «Падарунак гораду», і ў гэты раз вызваліліся дапамагчы, у прыватнасці, набыць неабходныя будаўнічыя матэрыялы.
Па просьбе Аляксандра Шубскага прадстаўнікі аддзелаў, службаў райвыканкама, Дзяржаўтаінспекцыі ў самыя сціслыя тэрміны правялі маніторынг вуліц, прылеглых да ўстаноў адукацыі, дзіцячых садкоў, пралічылі аб'ём работ, тэрміны і магчымасці іх выканання з улікам зніжэння кошту. Усе гэтыя лічбы будуць агучаны на чарговай сустрэчы з прадпрымальнікамі.
– Глыбоччына – найпрыгажэйшы край, дзякуй усім, хто многія дзесяцігоддзі прымнажаў яго славу і цяпер застаецца неабыякавым да вырашэння важных пытанняў, якія тычацца добраўпарадкавання горада, удасканалення наяўнай інфраструктуры, – адзначыў Аляксандр Шубскі.
Гаспадар гасцініцы «Сядзіба Якімовіч» Дзмітрый Якімовіч, адзін з першых, хто падтрымаў ідэю добраўпарадкавання тратуараў, нагадаў аб незавершаным будаўніцтве ўчастка пешаходнай дарожкі ўздоўж возера Кагальнае. Гэтае пытанне можна было б таксама вырашыць сумеснымі намаганнямі.
– Аляксандр Шубскі на пасадзе старшыні райвыканкама ўсяго некалькі тыдняў, таму прыемна, што сярод найбольш важных задач ён палічыў неабходным правесці сустрэчу з мясцовымі прадпрымальнікамі, – падкрэсліў дырэктар ПУП «Дзісеначка» Фёдар Ганебны. – Гэта значыць, ён верыць у нашы сілы, паважае нашу працу. У сваю чаргу мы таксама гатовы дапамагчы.
Тандэм улады і бізнесу дае магчымасць вырашыць мноства пытанняў, лічыць дырэктар ПУП «В ажуре» Юрый Татарыновіч.
У гутарцы з Аляксандрам Шубскім ён выказаў меркаванне аб недастатковасці адзінай архітэктурнай лініі, якая б аб'ядноўвала элементы вулічнага дэкору ў Глыбокім, дэкаратыўна-скульптурныя кампазіцыі. Таксама прадпрымальнік падаў шэраг іншых цікавых ідэй.
Некалькі гадоў таму Глыбоцкі раён быў названы лепшым для бізнесу сярод рэгіёнаў Віцебшчыны з насельніцтвам менш за 50 тыс. чалавек. Кіраўніцтва выказвае ўпэўненасць у тым, што і надалей узаемадзеянне ўлады і бізнесу будзе плённым і эфектыўным.
"Віцебскія весці". Фота з адкрытых крыніц.