Тэатр «Лялька» прывёз Гран-пры з Татарстана за спектакль для дарослых

Беларускі тэатр «Лялька» вярнуўся з Казані з галоўнай узнагародай Міжнароднага фестывалю «Шомбай-fest».

Віцебскія лялечнікі павезлі ў сталіцу Татарстана свой тытулаваны спектакль, які не раз атрымліваў узнагароды на тэатральных форумах, – «Загубленая душа, або Пакаранне грэшніка». І не пралічыліся: пастаноўку прызналі лепшай сярод 15, прадстаўленых трупамі з розных гарадоў Расіі і краін СНД.

У аснове спектакля – адзін з сюжэтаў кнігі «Шляхціц Завальня, або Беларусь у фантастычных апавяданнях» класіка беларускай літаратуры XIX стагоддзя Яна Баршчэўскага. Пастаноўку ў свой час ажыццявіў вядомы беларускі рэжысёр, лаўрэат Нацыянальнай тэатральнай прэміі Рэспублікі Беларусь Алег Жугжда. «Загубленая душа, або Пакаранне грэшніка» быў першым дарослым спектаклем на віцебскай сцэне і вось ужо больш за 23 гады застаецца ў рэпертуары.

Таццяна Пастэрнак, «Віцебскія весці».