Тэатралізаванае шэсце і розныя смакаты - у Глыбокім прайшоў "Вішнёвы фестываль"
Фестываль пачаўся тэатралізаваным шэсцем на чале з Вішнёвай каралевай да цэнтральнай плошчы, дзе на працягу дня на сцэне будзе ісці святочны канцэрт. Старшыня Глыбоцкага райвыканкама Аляксандр Шубскі адзначыў, што свята ў гэтым годзе праходзіць у больш сціплым фармаце з-за пандэміі і закрытых межаў. У вішнёвую сталіцу Беларусі не змаглі прыехаць госці з далёкага і блізкага замежжа.
"Арганізатары і ўдзельнікі пастараліся зрабіць усё, каб фестываль стаў насычаным мерапрыемствамі, станоўчымі эмоцыямі і новымі ўражаннямі. Свае віншаванні і пажаданні накіравалі сябры і партнёры з Грузіі, Ізраіля, Латвіі, Літвы, Малдовы, Польшчы, Расіі і Украіны", - адзначыў кіраўнік раёна і выказаў надзею, што ў 2021 годзе вішнёвае свята збярэ ўсіх сваіх сяброў.
Сёлета неад'емнай часткай форуму стала ўшанаванне медыцынскіх работнікаў. На галоўнай сцэне адбылася цырымонія ўзнагароджання медыкаў і валанцёраў.
Уся цэнтральная частка Глыбокага літаральна жыве фестывалем: працуюць падворкі з пачастункамі, гандаль, свае вырабы прапануюць народныя майстры, фермеры прадаюць мёд з даданнем вішні, прадпрымальныя мясцовыя жыхаркі выставілі вёдры з гэтай ягадай. Мясцовая вішня, як правіла, даражэйшая: 10 л ягады абыдуцца Br15. У іншых раёнах Віцебскай вобласці такі аб'ём можна купіць за Br10. Але тутэйшая ягада саладзейшая, што многіх здзіўляе, бо ўсе прывыклі да кіславатага смаку вішні.
На падворках можна паспрабаваць розныя смакаты з вішні - ад звыклых салодкіх да вельмі незвычайных. У адной палатцы нават прапанавалі ацаніць сала з вішняй.
У другой палове дня ў скверы маладых адбылася рэгістрацыя "Вішнёвага вяселля". Таксама гасцей форуму чакалі тэматычны квэст, сустрэча ў рэзідэнцыі Вішнёвай каралевы, аўто- і моташоў, маладзёжны open air.
"Вішнёвы фестываль" праходзіць у Глыбокім у восьмы раз, у 2017 годзе ён атрымаў статус міжнароднага свята. У 2013-м у горадзе з'явілася скульптура вішні, у 2018-м на беразе возера Кагальнае ў цэнтры Глыбокага - рэзідэнцыя Вішнёвай каралевы.-0-
