Тэма тыдня: Беларусь рыхтуецца да правядзення II Еўрапейскіх гульняў
Кансалідаваць нацыю
Прэзідэнт Беларусі, прэзідэнт Нацыянальнага алімпійскага камітэта Аляксандр Лукашэнка заявіў на пашыраным пасяджэнні Выканкама НАК, што правядзенне Еўрагульняў кансалідуе нацыю. «Еўрапейскія гульні – важная падзея, якая павінна надаць магутны ідэалагічны імпульс нашаму грамадству», - падкрэсліў беларускі лідар.
Аляксандр Рыгоравіч нагадаў, што Беларусь амаль год таму атрымала ганаравае права прыняць у 2019 годзе гэты спартыўны старт. Гэта была прапанова міжнароднай спартыўнай грамадскасці, якая высока ацаніла заслугі краіны ў развіцці спорту, а таксама правядзенне ў рэспубліцы спаборніцтваў і іншых міжнародных мерапрыемстваў, у тым ліку чэмпіянату свету па хакеі 2014 года, які прызнаны лепшым за гісторыю турніру. «Ужо шмат гадоў у Беларусі ствараецца сучасная інфраструктура, і не толькі спартыўная. Да нас з задавальненнем прыязджаюць госці з усіх куткоў свету. Вялікае значэнне пры гэтым мае існуючая ў нашай краіне атмасфера стабільнасці, талерантнасці і, самае галоўнае, бяспекі», - заўважыў кіраўнік дзяржавы.
Пытанні бяспекі
Асобна Аляксандр Лукашэнка спыніўся на пытаннях бяспекі: як паказвае міжнародная абстаноўка, сёння гэта адна з ключавых праблем. «Мы не павінны дапусціць і ценю сумневу ў надзейнасці Беларусі. Самае галоўнае тут - не самазаспакойвацца, - сказаў Прэзідэнт. - У нас хапае нядобразычліўцаў, якія паспрабуюць нас у гэтым плане пераканаць. І не дай бог мы дапусцім нешта падобнае, што адбываецца ў Заходняй Еўропе... Галоўнае на гульнях - спартыўныя спаборніцтвы і святочная атмасфера для нашых суграмадзян і асабліва гасцей. Яны павінны, атрымаўшы спрыяльныя ўражанні аб краіне, аб сталіцы, з такімі ўражаннямі і вярнуцца дадому».
Кіраўнік дзяржавы падкрэсліў, што ад таго, як Беларусь правядзе Еўрагульні, якія спартыўныя вынікі пакажа, як прадставіць сябе Еўропе, на дзесяцігоддзі складзецца меркаванне аб краіне і аб нашым народзе. Таму ў пытанні арганізацыі гэтага найбуйнейшага спартыўнага форуму Старога Свету дробязей няма і быць не можа. Ад сустрэчы на мяжы, абслугоўвання ў гасцініцах, арганізацыі харчавання да знешняга выгляду гарадоў рэспублікі - усё павінна быць на вышэйшым узроўні.
Прыгожа і душэўна
«Мы павінны нацыю, краіну, дзяржаву вывесці на вышэйшую прыступку развіцця, і гульні павінны падштурхнуць да гэтага. Усё трэба рабіць для людзей. Ніякай помпезнасці. Трэба рабіць прыгожа, - адзначыў беларускі лідар.
- Мы не перасягнем адкрыццё Алімпіяды ў Сочы і падобнага мерапрыемства ў Баку. І не трэба. Таму што там затрачаны сотні мільёнаў долараў толькі на адкрыццё і закрыццё. Не хачу сказаць, што ў нас няма такіх грошай. Калі б гэта на карысць было, то знайшлі б. Але гэтага не трэба. Трэба пабіць гэты рэкорд душэўнасцю, адкрытасцю народа».
Касаючыся неабходнасці прывядзення ў парадак да гульняў галоўных аб'ектаў і выканання работ па добраўпарадкаванні, кіраўнік дзяржавы адзначыў, што ў гэтым плане зрабіць трэба адносна няшмат – мы ўтрымліваем у парадку краіну і асабліва Мінск. Аляксандр Лукашэнка падкрэсліў, што ўся створаная да гульняў матэрыяльная база застанецца ў Беларусі на дзесяцігоддзі. «Нам нічога не трэба будзе рабіць 10-20 гадоў. Усё гэта застанецца для таго, каб рыхтаваць нашых спартсменаў, зборныя каманды», - дадаў беларускі лідар.
Абвешчаны конкурсы
У ліпені гэтага года ў Мінску быў прадстаўлены лагатып II Еўрапейскіх гульняў. Ідэяй да яго стварэння стаў лозунг «Ідзі за марай». Пра мару распавядае наша нацыянальная легенда – пра цудоўную кветку папараці, якая квітнее ў летнюю ноч на Івана Купалу. І ў таго, хто здолее яе знайсці, збудуцца ўсе жаданні. Так і атлеты з усіх куткоў Еўропы збяруцца ў Мінску ў чэрвені 2019 года, крочачы за сваёй марай, каб здабыць каштоўную ўзнагароду. Афіцыйным дэвізам II Еўрагульняў будзе выказванне «Bright Year, Bright You» («Яркі год, яркі ты»). У скарочаным выглядзе ён будзе пазначацца як BY. Таксама будзе руская варыяцыя лозунга – «Время ярких побед» і беларуская – «Час яскравых перамог».
У Беларусі ідзе актыўная кампанія па распрацоўцы талісмана будучых Еўрагульняў, прыняць удзел у конкурсе можа любы ахвотны. Трэба прапанаваць ідэю талісмана, выяву і імя. Талісман павінен адпавядаць алімпійскім каштоўнасцям і слогану турніру. Таксама абвешчаны конкурс на стварэнне глыбокіх па змесце і сучасных па сродках выразнасці песень для цырымоній адкрыцця і закрыцця Еўрагульняў-2019. З падрабязнасцямі правядзення конкурсаў можна азнаёміцца на сайтах міністэрстваў інфармацыі і культуры.
Выкарыстаць шанец
Кіраўнік дзяржавы адзначыў, што на Еўрапейскіх гульнях 2019 года жыццё не заканчваецца, наперадзе шмат буйных міжнародных спартыўных мерапрыемстваў, у тым ліку чэмпіянат свету па хакеі 2021 года. «Гульні - гэта шанец не толькі ўскалыхнуць краіну, народную гаспадарку, але і якасна прасунуцца ў тэхналогіях, адукацыі і кампетэнцыях нашых спецыялістаў. Усё, што мы зробім, усё, чаму навучымся, спатрэбіцца нам і, галоўнае, нашым дзецям», - рэзюмаваў Аляксандр Лукашэнка.
Думкі
Выканаючы абавязкі прэзідэнта Еўрапейскіх алімпійскіх камітэтаў (ЕАК) Янез Качыянчыч: «Павінен сказаць, мы зрабілі выдатны выбар. Не толькі таму, што Беларусь выдатна выступіла ў Баку ў 2015 годзе, дзе заваявала больш за 40 узнагарод, але ваша краіна таксама мае добрую інфраструктуру, у чым члены ЕАК ужо паспелі не раз пераканацца. Акрамя таго, беларусы моцныя спартыўнымі традыцыямі, у Мінску ведаюць і ўмеюць арганізоўваць буйныя падзеі. У 2014 годзе тут адбыўся чэмпіянат свету па хакеі, і гэты экзамен вы вытрымалі на выдатна».
Вячаслаў Дурноў, першы намеснік міністра спорту і турызму:
«Беларусь заўсёды праводзіць міжнародныя спартыўныя спаборніцтвы на высокім узроўні і атрымлівае высокія ацэнкі замежных гасцей, што станоўча ўплывае на імідж краіны».
Па матэрыялах БелТА.