Тэма будаўніцтва жылля для шматдзетных сем'яў пераважала на прыёме грамадзян Качанавай

Кіраўнік Адміністрацыі Прэзідэнта Беларусі Наталля Качанава правяла прыём грамадзян у Верхнядзвінску Віцебскай вобласці. Замест запланаваных двух гадзін прыём доўжыўся амаль чатыры. Па выніках Наталля Качанава пагутарыла з журналістамі. 

"Пытанняў было нямала. Прыйшлі жыхары Верхнядзвінскага раёна, прыехалі грамадзяне з іншых рэгіёнаў, каб расказаць пра хвалюючыя пытанні. Такія выязныя прыёмы мы праводзім для таго, каб дапамагчы людзям у вырашэнні іх праблем. Але яшчэ і для таго, каб паглядзець на працу мясцовых органаў улады. Калі яны ўважліва ставяцца да праблем жыхароў, то пытанні ў большай ступені вырашаюцца на месцах. Разам з тым, вядома, ёсць праблемы, якія неабходна вырашаць на ўзроўні міністэрстваў і рэспубліканскіх ведамстваў. Адна з такіх, якая сёння была агучана, - забеспячэнне жыллём шматдзетных сем'яў. Урад ужо прыняў пэўныя меры па забеспячэнні шматдзетных сем'яў жыллём і павелічэнні крэдытных рэсурсаў на гэты год, але ў такіх невялікіх гарадах, як Верхнядзвінск, дзе некалькі гадоў не будуецца шматкватэрнае жыллё, гэтае пытанне вырашаць досыць няпроста. Я думаю, трэба яшчэ прапрацоўваць гэту тэму на ўзроўні міністэрстваў", - сказала кіраўнік Адміністрацыі Прэзідэнта.

Разам з тым Наталля Качанава адзначыла, што няправільна было б у вырашэнні праблемы забеспячэння жыллём спадзявацца толькі на дзяржаву. "Калі казаць пра невялікія гарады, то тут сёння ёсць магчымасць вылучыць зямельны ўчастак для шматдзетных сем'яў. Яго гатовыя прадаставіць, ёсць крэдытныя рэсурсы, але сем'і не могуць будаваць, таму што, напрыклад, нехта не працуе, - сказала яна. - Не толькі дзяржава павінна паклапаціцца пра шматдзетныя сем'і, але і самі людзі павінны прымаць меры".

Акрамя таго, Наталля Качанава звярнула ўвагу, што некалькі зваротаў тычыліся дзейнасці дзяржорганаў і арганізацый, якія непасрэдна працуюць з людзьмі. "Да людзей трэба ставіцца карэктна. Пра гэта гаварыў кіраўнік дзяржавы, калі звяртаўся да

парламенту і народу. Людзей трэба ўмець слухаць і чуць іх. Гэта вельмі важна. А сёння было некалькі такіх зваротаў, - канстатавала яна. - У тых выпадках, калі трэба проста, даступна, карэктна чалавеку патлумачыць, што трэба зрабіць, каб вырашыць яго пытанне, мы пачынаем разважаць, даваць нейкія ацэнкі. Гэта недапушчальна\".

На прыёме ў Наталлі Качанавай было агучана 13 пытанняў, некаторыя звароты былі калектыўнымі. Акрамя жыхароў Верхнядзвінскага раёна да кіраўніка Адміністрацыі Прэзідэнта сёння звярнуліся заяўнікі з іншых раёнаў Віцебскай вобласці і горада Віцебска, з Гомельскай і Мінскай абласцей. Акрамя жыллёвага будаўніцтва агучаны праблемы сферы ЖКГ, арганізацыі дарожнага руху, рамонту дарог, перапрацоўкі другасных рэсурсаў, махлярства ў будаўніцтве жылля і інш. Усе пытанні ўзяты на кантроль.

Алена Ціханава - БЕЛТА.