Талачын завершыць падрыхтоўку да абласных "Дажынак" праз два тыдні

Талачын завершыць падрыхтоўку да абласнога фестывалю-кірмашу працаўнікоў вёскі "Дажынкі" да сярэдзіны верасня. Пра гэта паведаміў учора ў райцэнтры старшыня Віцебскага аблвыканкама Мікалай Шарснёў.

Кіраўнік рэгіёну прыняў удзел ва ўрачыстым мерапрыемстве, прысвечаным Дню ведаў, у сярэдняй школе №1 Талачына, якая прыняла дзяцей пасля капітальнага рамонту, а таксама азнаёміўся з ходам падрыхтоўкі да абласных "Дажынак".

Дзяліўшыся ўражаннямі ад убачанага на будаўнічых пляцоўках горада, губернатар адзначыў, што работы ідуць па графіку, і нават з апярэджаннем. "Практычна ўсе работы будуць завершаны да сярэдзіны верасня, так што ў нас застанецца час, каб як след падрыхтавацца да свята. Няма ніякага нервозу, усё робіцца ў спакойным рэжыме, - сказаў кіраўнік вобласці. - Задача стаяла абнавіць цэнтр горада і стварыць непаўторны аблік населенага пункта, сваю "ізюмінку". Таму цэнтральная плошча, сквер набылі зусім іншы выгляд. Не пазнаць і Дом культуры, ён асучаснены, па афармленні і абсталяванні гэта ўжо ўстанова іншага ўзроўню. Важна і тое, што мы стварылі ў горадзе новую бібліятэку. Цяпер бібліятэкі практычна не будуюць, не марнуюць на гэта грошы, але ў Талачыне бібліятэка з'явілася, і я ўпэўнены, што яна прынясе карысць насельніцтву, асабліва моладзі і дзецям. Трэба толькі бібліятэкарам актывізаваць работу з падрастаючым пакаленнем. Для мяне, як кіраўніка вобласці, гэта вельмі важна".

Па яго словах, правядзенне свята працаўнікоў вёскі, маштабная падрыхтоўка да фестывалю-кірмашу маюць вельмі вялікае значэнне, такую практыку неабходна працягваць. "Безумоўна, цяжка выконваць такі аб'ём работ, але ёсць прыказка - вочы баяцца, а рукі робяць. Менавіта такім шляхам мы ідзем. Першапачаткова паслядоўна вызначылі аб'ёмы работ, хто і якімі сіламі іх будзе выконваць, і цяпер ужо відаць, што атрымалі годны вынік. Першапачаткова планавалася правесці работы на 95 аб'ектах, цяпер іх больш за сто", - канстатаваў губернатар.

Мікалай Шэрстнёў падкрэсліў, што ўсё гэта робіцца для людзей, і жыхары горада, безумоўна, ацэняць вынікі. "Ім тут жыць, выхоўваць дзяцей, карыстацца медыцынскімі паслугамі, бібліятэкай, школай, дзіцячым садам і г.д. Гэта вялікая справа для горада. І мы паслядоўна будзем працягваць гэту працу", - сказаў старшыня аблвыканкама.

Папярэдне датай правядзення абласных "Дажынак" у Талачыне вызначана 25 верасня.

Алена Ціханава, БелТА.