Талачынскі ільнокамбінат прададзены на аўкцыёне

30 мая камітэтам дзяржаўнай маёмасці Віцебскага аблвыканкама на электронных таргах быў прададзены былы ільнокамбінат у вёсцы Зялёны Бор Талачынскага раёна.

Ільнокамбінат, які раней належаў сельскагаспадарчаму прадпрыемству «Рыдамльскі», спыніў сваю працу ў верасні 2023 года.

Пасля было прынята рашэнне аб яго продажы на аўкцыёне адразу за базавую велічыню.

Гэта была адна з самых вялікіх невыкарыстоўваемых вытворчых пляцовак на тэрыторыі Віцебскай вобласці ‒ будынкі плошчай 6017 кв.м. размешчаны на зямельным участку плошчай больш за 21 га.

Кошт продажу склаў 17 базавых велічынь (па адной базавай за кожны аб'ект нерухомасці).

Былы ільнокамбінат, для пашырэння сваёй дзейнасці, набыло сельскагаспадарчае прадпрыемства з Кобрынскага раёна Брэсцкай вобласці, якое аказалася адзіным удзельнікам аўкцыёну.

Усяго з пачатку года камітэтам праведзена 58 выніковых аўкцыёнаў па продажы невыкарыстоўваемай дзяржмаёмасці. Дзяржаўны бюджэт пры гэтым папоўніўся на суму амаль 2,5 мільёна рублёў.