Гандлёвыя аб'екты Віцебскай вобласці далучацца да акцыі «Здаровае сэрца – вектар жыцця»

У некаторых гандлёвых аб'ектах Віцебскай вобласці 12-13 лістапада будуць працаваць "прыёмныя" па выяўленні праблем з кровазваротам як частка рэспубліканскай медыка-асветніцкай акцыі "Здаровае сэрца - вектар жыцця". Пра гэта выконваючая абавязкі галоўнага ўрача абласнога кардыялагічнага дыспансера Алена Кузняцова на прэс-канферэнцыі па тэме прафілактыкі сардэчна-сасудзістых захворванняў.

Кропкі агляду жыхароў вобласці для выяўлення фактараў рызыкі і хвароб сістэмы кровазвароту з выдачай рэкамендацый па ўмацаванні здароўя разгорнуцца з 9.00 да 20.00 не толькі ў бальніцах і паліклініках, ФАПах, аптэках і іншых установах, але таксама ў гандлёвых дамах, гіпермаркетах і крамах. Напрыклад, у Віцебску пункты вымярэння артэрыяльнага ціску, росту і масы цела будуць працаваць у ГЦ "Эвіком", у краме "Веста" у гарпасёлку Руба, на галоўпаштамце, у аптэках № 31, 128, 164, 171, на здраўпунктах прадпрыемстваў (малочны завод, мясакамбінат, завод трактарных запчастак, шарсцяны камбінат, "Маналіт", "Віцебскдрэў", "Кераміка"), у паліклініках. Акрамя таго, у гэтых пунктах можна будзе атрымаць талон удзельніка акцыі. Пры яго прад'яўленні ў абласным кардыядыспансеры або любой амбулаторна-паліклінічнай установе вобласці можна будзе трапіць на прыём да ўрача-кардыёлага і ўрача-тэрапеўта без запісу. У абласным кардыядыспансеры ў дні акцыі з 10.00 да 18.00 будзе працаваць гарачая лінія па тэлефоне: 52-69-27.

Сярод іншых мерапрыемстваў акцыі запланаваны выступленні ў СМІ урачоў-тэрапеўтаў, кардыёлагаў, герыятраў арганізацый аховы здароўя вобласці; правядзенне круглых сталоў па пытаннях прафілактыкі, дыягностыкі і магчымасцях лячэння захворванняў сардэчна-сасудзістай сістэмы; афармленне стэндаў; раздача памятак і буклетаў па здаровым ладзе жыцця.

Кацярына Князева, БелТА.