Урачыстая цырымонія адкрыцця XXV фестывалю мастацтваў «Славянскі базар» адбылася ў Віцебску (+Фотарэпартаж)

Дзякуючы «Славянскаму базару ў Віцебску» свет знаёміцца з Беларуссю – чыстай, светлай Белай Руссю, з яе нацыянальнай культурай і гасцінным народам, сказаў Прэзідэнт Беларусі Аляксандр Лукашэнка падчас урачыстага адкрыцця юбілейнага XXV Міжнароднага фестывалю мастацтваў.

Кіраўнік дзяржавы адзначыў, што «Славянскі базар» – равеснік суверэннай Беларусі, бо зрабіў свае першыя крокі ў год здабыцця рэспублікай незалежнасці. «Ён развіваецца разам з краінай, і ў ім, як у люстэрку, адлюстроўваецца кожны этап станаўлення маладой дзяржавы. Цяперашні юбілейны форум стаў цэнтральнай падзеяй абвешчанага ў Беларусі Года культуры. Гэты свята ўвасабляе наша духоўнае багацце, адкрытасць і цікавасць да культуры розных народаў. Нездарма мы аб'ядналіся некалі – Беларусь, Расія і Украіна. Мы сталі ядром фестывалю і на працягу гэтых гадоў дэманструем культурнае адзінства нашых традыцый і дасягненняў», – падкрэсліў Аляксандр Лукашэнка.

Па словах Прэзідэнта, віцебскі фестываль параўноўваюць з Алімпійскімі гульнямі. "Калі перафразаваць П'ера дэ Кубертэна, мы гаворым: "О фестываль, ты – мір!". Гэта сапраўды пляцоўка міру і дабра. І яна яшчэ будзе запатрабавана", – сказаў беларускі лідар і дадаў, што ў Беларусі, Расіі і Украіне асаблівае значэнне надаецца развіццю нацыянальнага мастацтва, беражліва захоўваюцца традыцыі і творчыя дасягненні папярэднікаў. Таму мы па праву можам заявіць, што гэтыя тры краіны – цытадэль традыцыйнай культуры. «Асабліва важна гэта ў наш час, калі ў свеце губляюцца тыя арыенціры, якія раней згуртоўвалі людзей розных поглядаў, пакаленняў і культур, – звярнуў увагу Аляксандр Лукашэнка. – Многія краіны сёння пакутуюць ад міжнацыянальнай варожасці, рэлігійнай варожасці, заняпаду маралі, вострых супярэчлівых

канфліктаў. Думаю, справа ў тым, што плённае развіццё мастацтва патрабуе узаемаразумення, а не процістаяння, умацавання гуманістычных традыцый, а не варварскага разбурэння помнікаў культуры і адмаўлення ўсіх устояў грамадства. Менавіта на канструктыўных прынцыпах грунтуецца наш фестываль, у гэтым яго сіла і прывабнасць».

Прэзідэнт асабліва падкрэсліў, што невыпадкова домам для «Славянскага базару» стаў цудоўны горад на Дзвіне. «Віцебшчына – адзін з унікальных цэнтраў славянскай культуры, дзе існуе доўгая бесперапынная традыцыя культурнага будаўніцтва, творчага стварэння, – адзначыў беларускі лідар. – Яна бярэ пачатак з часоў Ефрасінні Полацкай, Францыска Скарыны і працягваецца па сённяшні дзень». Кіраўнік дзяржавы нагадаў, што нямала знакамітых дзеячаў культуры родам з прыдзвінскага краю, сярод іх кампазітар Анатоль Багатыроў, пісьменнікі Міхась Лынькоў, Уладзімір Караткевіч, Васіль Быкаў, Петрусь Броўка, драматург Аляксей Дудараў, мастакі і скульптары Юрый Пэн, Марк Шагал, Міхаіл Савіцкі. Гэта вытокі нашага мастацтва, якімі мы ганарымся.

Гаворачы пра тое, што даў фестываль Віцебску, Беларусі і ўсяму свету, Аляксандр Лукашэнка вылучыў стварэнне унікальнага амфітэатра, у якім увасобіліся самыя смелыя сцэнічныя навацыі, і тое, што за гэтыя гады міжнародны форум адкрыў сотні талентаў, даў пуцёўку ў жыццё масцітым артыстам, маладым выканаўцам і юным дараванням. Ён ператварыў выдатны горад Віцебск не толькі ў сучасную культурную сталіцу Беларусі, але і ў фестывальную сталіцу свету са штаб-кватэрай Сусветнай асацыяцыі фестываляў. Ён прыцягнуў у нашу краіну тысячы турыстаў, умацаваў яе станоўчы імідж, ажывіў эканоміку.

"Самае галоўнае, што кожны год фестываль дорыць мільёнам людзей сапраўднае, шчырае, душэўнае свята – свята дружбы, радасці, весялосці, творчасці, якое доўга жыве ў нашых сэрцах. Ён спалучае ў сабе класіку і сучаснасць, павагу да традыцый і свабоду мастацкага пошуку, – падкрэсліў Прэзідэнт. – Цяпер, калі нават самыя прэстыжныя міжнародныя конкурсы аказваюцца не свабоднымі адзакулісных палітычных інтрыг, нам удаецца захоўваць сумленнасць і непрадузятасць нашага «Славянскага базару». Менавіта таму ён знайшоў шлях да сэрцаў мноства гледачоў на пяці кантынентах планеты».

Цёплыя словы ў адрас фестывалю выказаў прэзідэнт Расіі Уладзімір Пуцін. Міністр культуры РФ Уладзімір Медзінскі зачытаў прывітальны тэлеграм. У ёй гаворыцца, што маштабнае культурнае мерапрыемства, несумненна, спрыяе духоўнаму яднанню славянскіх народаў, умацаванню даверу і ўзаемаразумення паміж імі. Яго значэнне для развіцця міжнароднага гуманітарнага супрацоўніцтва цяжка пераацаніць. Вядома, асаблівую каштоўнасць маюць намаганні арганізатараў па падтрымцы адоранай моладзі, якая робіць першыя крокі ў свет вялікага мастацтва. «Упэўнены, што цяперашні фестываль пройдзе ярка, відовішчна, падорыць удзельнікам і гледачам самыя пазітыўныя, незабыўныя ўражанні», – напісана ў пасланні.

Паздраўляльныя тэлеграмы таксама накіравалі прэзідэнты Чэхіі, Балгарыі, Сербіі. На працягу ўсяго вечара шчырыя словы падзякі Прэзідэнту Беларусі і арганізатарам фестывалю гучалі як у відэапасланнях ад вядомых дзеячаў культуры нашай краіны і блізкага замежжа, так і са сцэны ад зорак, якія ўдзельнічаюць у гала-канцэрце.

Па традыцыі на адкрыцці форуму Аляксандр Лукашэнка ўручыў спецыяльную ўзнагароду "Праз мастацтва – да міру і ўзаемаразумення", якая сёлета прысуджана народнаму артысту Беларусі Міхаілу Фінбергу і Нацыянальнаму акадэмічнаму канцэртнаму аркестру Беларусі.

Лаўрэатамі прэміі Саюзнай дзяржавы ў галіне літаратуры імастацтва за 2015-2016 гады, узнагароджанне якіх таксама адбылося падчас гала-канцэрта, сталі народны артыст СССР, мастацкі кіраўнік і галоўны дырыжор Дзяржаўнага акадэмічнага Вялікага сімфанічнага аркестра імя П.Чайкоўскага Уладзімір Федасееў. Прэмія прысуджана аўтарскаму калектыву ў складзе аўтара ідэі, архітэктара, протаіерэя, настаяцеля Усіхсвяцкага прыхода Мінска Фёдара Поўнага; скульптара, заслужанага дзеяча мастацтваў Беларусі Уладзіміра Слабодчыкава; архітэктара, лаўрэата Дзяржаўнай прэміі Беларусі Ігара Марозава. Прэміі Саюзнай дзяржавы ўдастоены аўтарскі калектыў у складзе народнага артыста Беларусі і мастацкага кіраўніка ансамбля "Сябры" Анатоля Ярмоленкі; кампазітара, заслужанага дзеяча мастацтваў Беларусі Алега Елісеенкава; паэта, уладальніка літаратурнай прэміі "Залаты купал" Івана Юркіна.

Заслужаныя ўзнагароды атрымалі і майстры мастацтваў, якія унеслі вялікі асабісты ўклад у станаўленне і развіццё фестывалю.

Алена Сыс, «Віцебскія весці». Фота Аляксандра Хітрова - БЕЛТА.