Традыцыйны «Дзень без аўтамабіля» пройдзе на Віцебшчыне 22 верасня

Штогод жыхарам вобласці прапануюць далучыцца да міжнароднай акцыі, накіраванай на змяншэнне колькасці шкодных выкідаў у атмасферу. Аўтааматараў просяць на адзін дзень пакінуць свае машыны ў гаражы і скарыстацца іншымі спосабамі перамяшчэння. Згадзіцеся, часам да крамы ці на працу цалкам можна дайсці пешшу або дабрацца на грамадскім транспарце. А калі надвор'е дазваляе, можна і на ровары пакатацца.

Каб гэту ініцыятыву падтрымала максімальная колькасць прыдзвінцаў, на экранах у гандлёвых аб'ектах і на плошчах абласнога цэнтра ўжо некалькі дзён трансліруюць відэаролікі, якія распавядаюць пра гэту акцыю. Акрамя таго, на аўтастаянках, прыпыначных пунктах і ў месцах масавага адпачынку распаўсюджваюцца тэматычныя улёткі, якія заклікаюць кіроўцаў 22 верасня адмовіцца ад перамяшчэння на сваёй машыне. Зрабіла свой унёсак у зніжэнне колькасці шкодных выкідаў і абласная лабараторыя аналітычнага кантролю – яе супрацоўнікі з 18 па 20 верасня правялі кантроль якасці аўтамабільнага паліва на віцебскіх АЗС.

Лілія Іўчанка, «Віцебскія весці»