Трактарнае ралі МТЗ стане традыцыйным і будзе праходзіць не толькі ў Беларусі

ААТ "Мінскі трактарны завод" плануе зрабіць традыцыйным правядзенне ралі і такім чынам праводзіць выпрабаванні новай тэхнікі. Пра гэта паведаміў генеральны дырэктар прадпрыемства Фёдар Даматэнка, які прысутнічаў на трактарным ралі Парыж-Масар у Віцебскай вобласці.

Гаворачы пра саму ідэю правядзення трактарных гонак, гендырэктар адзначыў, што гісторыя гэтая зарадзілася летась. "Кіраўнік дзяржавы наведваў МТЗ, мы прадставілі тады макетны ўзор трактара і паабяцалі Прэзідэнту, што праз пару месяцаў у Віцебскую вобласць будзе адгружана 10 новых трактароў на выпрабаванні па камерцыйных кантрактах. Выпрабаванні гэтыя трактары вытрымалі, працуюць у гаспадарках і сёння прынялі ўдзел. Для таго каб даказаць адпаведнасць гэтых машын, мы вырашылі пайсці на эксперымент - правесці гоначныя выпрабаванні. Акрамя машын, якія працуюць у Віцебскай вобласці, мы прывезлі на ралі трактары, якія толькі схадзілі з канвеера. Іх ніхто спецыяльна не рыхтаваў. Вы бачылі - яны дайшлі да фінішу і выглядалі вельмі годна", - сказаў гендырэктар.

МТЗ плануе зрабіць гэты праект традыцыйным. "Дзе ён будзе праходзіць, зараз вызначаемся. Ёсць цікавая ідэя - мы шукалі, дзе вёскі носяць мілагучныя назвы і знайшлі ў Чалябінскай вобласці вёску Парыж і мілагучную Масару. Хутчэй за ўсё, у Расіі дзесьці ў канцы жніўня правядзем аналагічныя спаборніцтвы, але ўжо з іншай прадукцыяй. А ў планах у нас правесці такі ж прабег, але ўжо з новым унікальным трактарам у 450 конскіх сіл. Яго яшчэ практычна ніхто не бачыў, была толькі прэзентацыя. Машына праходзіць зараз выпрабаванні, і 10 такіх трактароў рыхтуюцца да выпуску. Думаю, менавіта гэтыя трактары ў наступным годзе прымуць удзел у такім прабегу-выпрабаванні", - падзяліўся планамі Фёдар Даматэнка. Ён таксама дадаў, што новыя трактары МТЗ, якія сёння прымалі ўдзел у ралі (прадстаўлялі каманду МТЗ), неўзабаве адправяцца ў Пухавіцкі раён

Мінскай вобласці. Маршрут трактарнага ралі Парыж-Масар пралягаў па Пастаўскім і Глыбоцкім раёнах паміж населенымі пунктамі Парыж і Масар. Стартавалі трактары ў полі каля Парыжа, па маршруце руху вялася відэаздымка спаборніцтва, у тым ліку з паветра (пры дапамозе камер на квадрокоптэрах). Завяршылася ралі ў Масары, дзе каля касцёла адбылася ўрачыстая цырымонія ўзнагароджання і канцэрт. Па задуме арганізатараў, гэта мерапрыемства павінна паспрыяць паляпшэнню іміджу прадпрыемства і павышэнню прэстыжу прафесіі трактарыста.

Алена Ціханава – БелТА.