Цэнтр для рэабілітацыі інвалідаў і іншыя аб'екты адкрылі ў Лепелі на Дзень горада
На доме №1 па вуліцы Данукалава ў райцэнтры ўрачыста адкрылі мемарыяльную дошку ў гонар аднаго з арганізатараў партызанскага руху на Віцебшчыне ў гады Вялікай Айчыннай вайны, камандзіра партызанскай брыгады «Аляксея», Героя Савецкага Саюза Аляксея Данукалава.
На пачатку ліпеня 1941-га палітрука Данукалаў разам з байцамі танкавай дывізіі вёў жорсткія баі з фашысцкімі захопнікамі пад Лепелем. Гэта быў адзін з самых маладых камбрыгаў: калі ён загінуў 27 красавіка 1944 года ў вёсцы Вялікія Дольцы Ушацкага раёна, яму было ўсяго 28. У 1946-м астанкі Аляксея Данукалава перапахавалі ў скверы на плошчы Свабоды ў Лепелі. У гонар легендарнага партызанскага камандзіра названы вуліцы ў Віцебску, Лепелі, Ліёзне і Ушачах.
– Важна, што абноўленая мемарыяльная дошка зроблена не за бюджэтныя сродкі, а за народныя грошы, сабраныя на суботніку. Нямала важна і тое, што пра гэтых герояў мы памятаем не толькі ў юбілейныя даты, але і ў будні, – падкрэсліў старшыня абласнога Савета дэпутатаў Уладзімір Церанцьеў.
Доўгачаканы Цэнтр сацыяльна-працоўнай, сацыяльна-бытавой і фізічнай рэабілітацыі інвалідаў пры аддзяленні дзённага знаходжання тэрытарыяльнага цэнтра сацыяльнага абслугоўвання насельніцтва – гэта сумесны праект Лепельскага райвыканкама, дабрачынных арганізацый «Дом замест Чарнобыля» і «ЭкаБудаўнік» пры фінансавай падтрымцы Федэральнага міністэрства па эканамічным супрацоўніцтве (Германія). З раённага бюджэту выдзелена каля 163 тыс. еўра, больш за 300 тыс. еўра – уклад нямецкага боку.
Будынак узведзены па экалагічнай тэхналогіі. Пры будаўніцтве ўжываліся шчэпы, гліна, трысняговыя пліты для ўцяплення і іншыя прыродныя матэрыялы.
У цэнтр пераехала аддзяленне дзённага знаходжання для інвалідаў, якое да гэтага часу займала чатыры невялікія пакоі ў ТЦСАН. Наведваюць аддзяленне 50 чалавек, 11 з іх – з сельскай мясцовасці. Усяго ж у раёне пражывае больш за 800 інвалідаў першай і другой груп.
Праект вельмі важны для раёна, паколькі дзякуючы пашырэнню плошчаў аддзялення дзённага знаходжання павысіцца даступнасць дапамогі інвалідам, у першую чаргу за кошт стварэння новых месцаў, таксама будуць адкрыты новыя гурткі і рэабілітацыйныя курсы.
На чарзе – будаўніцтва працоўных майстэрняў і інтэрната для тых наведвальнікаў цэнтра
На чарзе – будаўніцтва працоўных майстэрняў і інтэрната для тых наведвальнікаў цэнтра, якія будуць прыязджаць сюды з сяла, – адзначыў старшыня Лепельскага райвыканкама Барыс Ефрэмаў.
У цэнтры размесцяцца рэабілітацыйна-працоўныя майстэрні, у якіх людзі з абмежаванымі магчымасцямі будуць вучыцца даглядаць за раслінамі і асвойваць сакрэты фларыстыкі, вырабляць сувеніры і плясці з бісеру, асвойваць швейную справу, атрымліваць навыкі, неабходныя ў звычайным жыцці: гатаваць ежу, рамантаваць і сціраць бялізну.
Можна будзе з інструктарам-метадыстам заняцца на трэнажорах. Ёсць тут камп'ютарны клас, пакоі для адпачынку і правядзення мерапрыемстваў. Усе памяшканні ўкамплектаваны мэбляй і абсталяваннем.
Намеснік міністра працы і сацыяльнай абароны РБ Аляксандр Румак: Лепельскі цэнтр адзіны ў сваім родзе ў Беларусі
Тыя інваліды, хто асвоіць швейную справу, паліграфію і сублімацыйны друк, змогуць выконваць пасільныя заказы прадпрыемстваў і арганізацый або паспрабаваць сябе ў індывідуальнай працоўнай дзейнасці.
– Гэты цэнтр адзіны ў сваім родзе ў Беларусі. Унікальны ён як памерамі (у ТЦСАН гэта часцей за ўсё некалькі пакояў), так і комплекснасцю рэабілітацыі. Звычайна гэта ў асноўным гуртковая праца, а тут накіраванасць на прафесійную рэабілітацыю, каб для тых, хто хоча працаваць, інваліднасць не стала прысудам, – сказаў намеснік міністра працы і сацыяльнай абароны Рэспублікі Беларусь Аляксандр Румак.
Як і прынята, госці, якія прыбылі на адкрыццё цэнтра, дарылі падарункі. Чэк на 500 еўра прэзентавала кіраўнік дабрачыннай арганізацыі «Дом замест Чарнобыля» Шыл Эдэльтраўт, а старшыня абласнога Савета дэпутатаў Уладзімір Церанцьеў – сертыфікат на 2000 рублёў.
Абноўленымі сустрэлі навучальны год харчаблокі ўстаноў адукацыі раёна
У школах вёсак Бароўка і Заслонава, дзіцячым садзе №9 Лепеля завершаны бягучы рамонт сталовых, якія аснасцілі сучасным энергаэфектыўным і высокапрадукцыйным тэхналагічным абсталяваннем – параканвектаматамі, бульбачысткамі, хлебарэзкамі, электрамясарубкамі, посудамыйнымі і працірачна-рэзальнымі машынамі. Усяго на рамонт харчаблокаў і абсталяванне зрасходавана больш за 322 тыс. рублёў.
– Гэта дазволіць значна скараціць вытворчыя выдаткі і палепшыць якасць харчавання вучняў школ і выхаванцаў дзіцячых садкоў, – адзначыў намеснік старшыні Лепельскага райвыканкама Віктар Азаронак.
Расчыніў дзверы пасля рамонту і раённы Дом культуры
Тут абнавілі частку даху, а ў глядзельнай зале замянілі падлогу, столь, адзенне сцэны і крэслы. Касметычны рамонт зроблены ў кабінетах. Акрамя гэтага, РДК атрымаў новую гукавую і светлавую апаратуру.
– На гэта пайшло каля 300 тысяч рублёў з бюджэту раёна. На чарзе – рамонт астатняй часткі даху, – сказаў Віктар Уладзіміравіч.
Ва абноўленым Доме культуры перад гасцямі выступілі артысты райцэнтра, а напрыканцы прагучала ўсім знаёмая песня «Чарка на пасашок», якую 20 гадоў таму напісаў кампазітар, лепельчанін Аляксандр Балотнік.