Цэнтр культуры адкрыецца ў Талачыне да абласных "Дажынак"

Як паведамілі ў Талачынскім райвыканкаме, такую назву пасля капітальнага рамонту з мадэрнізацыяй атрымаў дом культуры. На аб'екце, які апошнія тры гады знаходзіўся ў аварыйным стане, праведзены значны аб'ём работ - умацаваны сцэны і праведзена іх цепларэнавацыя, заменена дахавая канструкцыя, уцяплілі столь. Унутры будынка таксама праведзены капітальны рамонт, для артыстаў абсталяваны дзве грымёркі, якія маюць выхад на сцэну, цалкам абноўлена глядзельная зала. "Сучаснае афармленне атрымала сцэна - у яе новае "адзенне", сучасная механіка, магутнае, але эканамічнае асвятляльнае абсталяванне, відэа і гукавая апаратура таксама адпавядаюць апошнім патрабаванням, - расказалі ў райвыканкаме. - Цяпер тут могуць выступаць самыя розныя калектывы і выканаўцы, сцэна прыстасавана і для тэатральных пастановак, і для вакальных нумароў".

Фінансаванне работ вялося з розных крыніц (задзейнічаны сродкі рэспубліканскага, абласнога і мясцовага бюджэтаў), але львіную долю выдаткаў узяў на сябе менавіта раённы бюджэт. "Работы вяліся зладжана і планамерна - літаральна за паўгода стары дом культуры, які быў пабудаваны ў Талачыне ў 60-х гадах мінулага стагоддзя, ператварыўся ў сучасны цэнтр. Створаныя тут умовы, несумненна, будуць спрыяць развіццю народнай творчасці, гуртковай работы, мастацкай самадзейнасці", - выказалі ўпэўненасць у выканкаме.

Чакаецца, што ўрачыстае адкрыццё цэнтра культуры ў Талачыне адбудзецца 25 верасня падчас абласнога фестывалю-кірмашу працаўнікоў вёскі "Дажынкі".

Алена Ціханава, БЕЛТА.