Цэнтральная раённая бальніца адкрылася ў Шаркаўшчыне

У цырымоніі адкрыцця прынялі ўдзел старшыня Віцебскага аблвыканкама Аляксандр Косінец, прадстаўнікі ўпраўлення аховы здароўя аблвыканкама, мясцовых органаў улады, грамадскасць гарадскога пасёлка. "Пятнаццаць гадоў таму пачалося будаўніцтва гэтай бальніцы, у 2003-м яно было прыпынена і адноўлена толькі ў 2009-м. Агульны аб'ём накіраваных інвестыцый склаў звыш Br40 млрд. І сёння мы адкрываем аб'ект аховы здароўя, які адпавядае ўсім еўрапейскім патрабаванням", - адзначыў Аляксандр Косінец.

Бальніца ўключае цэнтральнае стэрылізацыйнае аддзяленне, пральню, кіслародную станцыю, гараж і палатны корпус з прыёмным, тэрапеўтычным, хірургічным, педыятрычным аддзяленнямі, якія аснашчаны высокаэфектыўнай медтэхнікай, у тым ліку ЭКГ-апаратамі, кардыёманiторамi, фетальным маніторам, апаратамі УГД, штучнай вентыляцыі лёгкіх, эндаскапічным абсталяваннем. Для знаходжання пацыентаў абсталяваны камфортныя палаты. У бальніцы таксама знаходзіцца паліклінічнае аддзяленне і аптэка.

Прымяненне высокіх тэхналогій дазволіць урачам бальніцы праводзіць дыстанцыйнае кансультаванне з профільнымі спецыялістамі Віцебскага абласнога дыягнастычнага цэнтра. "Пры гэтым пастаўлена задача на 2013-2014 гады наладзіць аналагічную сувязь з гэтай установай аховы здароўя ўсіх раённых цэнтраў", - падкрэсліў старшыня аблвыканкама.

У узвядзенні бальніцы было задзейнічана больш за дзясятак будаўнічых арганізацый, у тым ліку Шаркаўшчынская ПМК-68, Глыбоцкая СПМК-26, "Вентмантаж" (Наваполацк), а таксама будаўнікі Глыбокага, Віцебска, Полацка, Наваполацка, Докшыц. Заказчыкам аб'екта выступаў УКС Віцебскага аблвыканкама, праектная арганізацыя - "Інстытут Віцебскграмадзянпраект", генеральны падрадчык - КУППСП "Полацксельбуд". Усім прадстаўнікам гэтых прадпрыемстваў губернатар выказаў словы падзякі за ўзгодненую і выніковую працу.

Касаючыся далейшага функцыянавання бальніцы, старшыня аблвыканкама даручыў выканаючаму абавязкі старшыні Шаркаўшчынскага райвыканкама Мікалаю Баговічу наладзіць стабільнае транспартнае паведамленне грамадскага транспарту з бальніцай, каб жыхарам раёна было зручна сюды дабірацца, а таксама падумаць аб забеспячэнні яе сучаснымі машынамі хуткай дапамогі і стварэнні пляцоўкі для санавіяцыі. "Для Віцебскай абласной клінічнай бальніцы будзе закуплены верталёт, і ў нас будзе ўласная санавіяцыя", - адзначыў губернатар.

"У цэлым пра Шаркаўшчыну мы сёння гаворым як пра аграрны раён, але такую пазіцыю трэба мяняць. Тут неабходна ствараць новыя эфектыўныя вытворчасці па перапрацоўцы лясных дароў, торфу, драўніны, здабычы мінеральнай вады і іншыя. Разглядаецца магчымасць адкрыцця ў Шаркаўшчыне філіяла абутковага прадпрыемства СААА "Марка". Да 2015 года ў гэтым раёне павінна быць створана не менш за 20 новых прадпрыемстваў. Таксама варта актыўна развіваць аб'екты сацыяльнай сферы", - дадаў Аляксандр Косінец.