Ва Ушачах урачыста адкрылі цэнтральную раённую бальніцу
Адкрыцця цэнтральнай раённай бальніцы жыхары Міёршчыны чакалі больш за два дзесяцігоддзі. Пачатак будоўлі супаў з распадам Савецкага Саюза, калі да правінцыйнай бальніцы ніхто не меў справы. Пазней яе ўзвядзенне не раз спрабавалі скончыць. Толькі справу зрушыць з мёртвай кропкі не ўдавалася, пакуль на даўгабуд не звярнуў увагу кіраўнік краіны. На ўвод бальніцы ў эксплуатацыю быў дадзены год.
Дзякуючы Адміністрацыі Прэзідэнта і Камітэту дзяржкантролю Беларусі міёрская медустанова ўвайшла ў інвестыцыйную праграму. Па ёй рэспубліканскі бюджэт і Віцебская вобласць вылучылі на завяршэнне будоўлі па 4 млн рублёў. А Міністэрства аховы здароўя на 1,8 млн рублёў закупіла абсталяванне.
I вось нядаўна сучасная раённая бальніца, будынак якой пачалі асвойваць медыкі і пацыенты яшчэ 8 траўня, была афіцыйна адкрыта. Яе ўвод у эксплуатацыю не толькі павысіць узровень аказання дапамогі мясцовым жыхарам, але і дасць магчымасць рэалізаваць унікальны праект у сферы аховы здароўя, аналагаў якому сёння ў краіне няма. У бліжэйшы час побач з Міёрскай ЦРБ можа з'явіцца першая ў Беларусі клініка, сертыфікаваная па еўрапейскіх стандартах.
Падчас урачыстага мерапрыемства старшыня абласнога Савета дэпутатаў Уладзімір Цярэнцьеў падкрэсліў значнасць падзеі: жыхары Міёршчыны атрымалі магчымасць для якасна новага медыцынскага абслугоўвання, а медыкі – выдатныя ўмовы для аказання дапамогі. Каб такое стала магчымым у максімальна кароткі тэрмін, паклапаціліся многія, у тым ліку будаўнікі “Полацксельбуда” і яшчэ больш за 20 арганізацый.
Новая Міёрская ЦРБ – гэта зручны кампактны медыцынскі гарадок. Трохпавярховы лячэбны корпус разлічаны на 120 ложкаў. Побач – адміністрацыйна-гаспадарчы корпус і харчблок. Кіраўнік дэпутацкага корпуса напярэдадні прафесійнага свята пажадаў медыкам, каб праца прыносіла задавальненне і мела плён.
– Здзейснілася даўняя мара жыхароў раёна – яны атрымалі новую сучасную бальніцу, – канстатаваў старшыня райвыканкама Ігар Кузняцоў і падзякаваў усім, хто займаўся гэтым.
Галоўны ўрач ЦРБ Алена Сівая і яе намеснік Святлана Бірукова з задавальненнем паказвалі гасцям палаты, расказвалі пра атрыманае абсталяванне. Дэманстравалі інкубатар для выхаджвання неданошаных дзяцей, адзін з трох, што маюць лячэбныя ўстановы краіны, спавівальныя сталы з падагрэвам, найсучаснейшыя апараты для ратавання чалавека ў рэанімацыі, лічбавы рэнтген-апарат, аснашчэнне аперацыйнага блока.
Першыя пацыенты ўжо ацанілі камфортнасць палат з гарачай вадой, санвузламі, новай мэбляй, якасць лячэння. Пра гэта гаварыла жанчына, якая некалькі дзён назад нарадзіла тут дзіця, як і другая, што была ў педыятрычным аддзяленні з захварэлай дачкой. Не шкадаваў удзячных слоў для медыкаў мужчына ў рэанімацыйнай палаце, які нядаўна перанёс інфаркт.
Адным словам, надзеі жыхароў Міёршчыны спраўдзіліся. Узнагароды за выкананую працу атрымалі будаўнікі, ключ ад будынка бальніцы – яе галоўны ўрач, а таксама сертыфікат ад райвыканкама на пакупку машыны хуткай дапамогі. Мясцовыя артысты ўпрыгожылі ўрачыстасць песнямі і танцамі.
ТАМАРА ПАШКЕВІЧ, фота аўтара, "Віцебскія весці".