Памёр народны паэт Беларусі Рыгор Барадулін

На 79-м годзе жыцця, пасля працяглай цяжкай хваробы, памёр беларускі паэт, перакладчык Рыгор Барадулін.

Рыгор Барадулін (Рыгор Іванавіч) нарадзіўся 24 лютага 1935 года ў сялянскай сям'і на хутары Верасоўка Ушацкага раёна Віцебскай вобласці. Вучыўся ва Ушацкай сярэдняй школе, скончыў філалагічны факультэт БДУ.

Першыя вершы Барадуліна былі надрукаваныя ў газеце "Чырвоная змена". Першы зборнік паэзіі "Маладзік над стэпам" выйшаў у 1959 годзе.

Рыгор Барадулін - аўтар шматлікіх кніг лірыкі, сатыры, зборнікаў для дзяцей. Паэт нярэдка звяртаецца да жанру малітвы, малітвы за постчарнобыльскае выжыванне і адраджэнне беларускай нацыі. За паэму "Балада Брэсцкай крэпасці" ўдастоены прэміі Ленінскага камсамола Беларусі (1976), за зборнік "Рум" і кнігу перакладаў лірыкі Ф. Гарсіа Лоркі "Блакітны звон Гранады" - Дзяржаўнай прэміі Беларусі ім. Я. Купалы (1976).

Усяго ж у народнага паэта выйшла каля 70 зборнікаў паэзіі. У 2006 годзе Барадулін трапіў у спіс намінантаў на Нобелеўскую прэмію па літаратуры. Вядомы паэт і перакладамі вершаў на беларускую мову. Ён узнагароджаны прэміяй Я. Купалы, ордэнам Дружбы народаў, ордэнам "Знак Пашаны", латвійскім Ордэнам Трох Зорак, медалём Францыска Скарыны.

Барадулін пераклаў на беларускую мову "Слова пра паходжанне войска Ігарава" (1986), кнігі Федэрыка Гарсіа Лоркі ("Блакітны звон Грэнады", 1975), Габрыелы Містраль ("Вецерліст", 1984), Караля Вайтылы, "Рубаі" Амара Хаяма, творы Шэкспіра, Байрана, Неруды, Міцкевіча, Есеніна і інш. Летам 2006 года выйшла кніга выбраных вершаў Барадуліна "Руны Перунавы". Рыгор Барадулін быў адным з найлепшых знаўцаў і шанавальнікаў беларускай мовы.

Барадулін — ганаровы доктар БДУ і ганаровы грамадзянін Ушацкага раёна. А ў 1992 годзе Рыгор Барадулін стаў апошнім беларусам, удастоеным звання народнага паэта.

Мінск /Кар. БЕЛТА/.