Унікальнае адзенне з арганічнай бавоўны для неданошаных дзяцей выпускаюць у Віцебску

У сучасным свеце шмат фактараў, якія неспрыяльна ўплываюць на здароўе чалавека і навакольнае асяроддзе: у паветры — выхлапныя газы, у прадуктах харчавання — кансерванты, у вадаёмы трапляюць сцёкі з растворанай у іх бытавой хіміяй, а не якасныя фарбавальнікі для тканін або цацак нярэдка выклікаюць алергічныя рэакцыі. У гэтых умовах людзі ўсё часцей аддаюць перавагу максімальна натуральным прадуктам і прыродным матэрыялам, якія не шкодзяць арганізму. Улічваючы гэтую тэндэнцыю, ТАА «Белль Бимбо плюс» пачало вырабляць спецыяльнае адзенне з арганічнай бавоўны. Прызначана яна для неданошаных і малавясных нованароджаных, здароўе якіх асабліва далікатнае. Вельмі важна засцерагчы гэтых драбкоў ад уздзеяння агрэсіўных рэчываў і хімікатаў, і цяпер у бацькоў ёсць такая магчымасць.

Яшчэ ў пачатку мінулага года дызайнеры кампаніі «Белль Бимбо плюс», якая выпускае адзенне для дзяцей да 16 гадоў, пачалі распрацоўваць новую калекцыю. Сёння яна ўключае 16 мадэляў зручных рэчаў для малых. Сярод іх як асобныя вырабы (паўкамбінезоны, ползункі і г. д.), так і разнастайныя камплекты (напрыклад, якія складаюцца з канверта і шапачкі або з распошонкі, шапачкі, рукавічак і пінетак). Да восені 2014 года каля трох тысяч адзінак прадукцыі было пашыта, а ў кастрычніку-лістападзе яны ўжо паступілі ў продаж. Цяпер гэтыя тавары віцебскага вытворцы прадстаўлены на беларускім і расійскім рынках.

Як распавяла начальніца аддзела забеспячэння ТАА «Белль Бимбо плюс» Вольга Васкецова, галоўная асаблівасць дадзенай калекцыі ў тым, што выраблена яна з максімальна бясшкоднай арганічнай бавоўны, якая адпавядае міжнароднаму стандарту GOTS. Такі сертыфікат выдаецца толькі на матэрыялы, вырабленыя па пэўных строгіх правілах. Дзейнічаць яны, растлумачыла Вольга Леанідаўна, пачынаюць яшчэ на этапе вырошчвання сыравіны. Па-першае, ніколі не выкарыстоўваюцца геннамадыфікаваныя насенне, акрамя таго, яны не апрацоўваюцца фунгіцыдамі і інсектыцыдамі. Па-другое, глеба, дзе будзе расці бавоўна, умацоўваецца галоўным чынам за кошт чаргавання культур, у яе забаронена ўносіць сінтэтычныя угнаенні. Па-трэцяе, ад пустазелля пазбаўляюцца з дапамогай праполкі, а не гербіцыдаў. Не менш жорсткія патрабаванні выконваюцца і ў далейшым — падчас уборкі ўраджаю і ў ходзе яго перапрацоўкі. У прыватнасці, для адбельвання валокнаў ніколі не выкарыстоўваецца хлор, не ўжываюцца хімічныя фарбавальнікі для тканіны. Таму вы не ўбачыце арганічнай бавоўны выклікаючых колераў або з маляўнічымі прынтамі. Адзенне заўсёды мае натуральныя тоны, яна бярэ не яркасцю, а камфортам і бяспекай.

Палатно, якое адпавядае стандарту GOTS, ТАА «Белль Бимбо плюс» закупляе ў Паўднёвай Карэі. Трэба сказаць, што далёка не ва ўсіх краінах ёсць вытворцы, якія выпускаюць падобную прадукцыю: справа занадта клапотная і адказная, не кожны вырашыцца за яе ўзяцца. Таму і адзенне з арганічнай бавоўны ў продажы сустракаецца рэдка, многія пра яе і не чулі. Па словах Вольгі Васкецовай, нават на буйных міжнародных выставах, у якіх удзельнічае кампанія «Белль Бимбо плюс», унікальная калекцыя заўсёды выклікае жывую цікавасць.

Лiлiя Iўчанка, "Вiцебскiя навiны"