Унікальны вопыт рэалізацыі мясцовых ініцыятыў па добраўпарадкаванні дваровых тэрыторый назапашаны ў Наваполацку

Унікальны вопыт рэалізацыі мясцовых ініцыятыў у справе добраўпарадкавання дваровых тэрыторый назапашаны ў Наваполацку. Яго вывучэнню і абагульненню было прысвечана выязное пасяджэнне прэзідыума абласнога Савета дэпутатаў.

На Віцебшчыне, – сказаў, адкрываючы пасяджэнне, старшыня аблсавета Аляксандр Ацясаў, – праведзена вялікая работа па навядзенні парадку на зямлі. Госці, якія прыязджаюць з-за межаў краіны, адзначаюць дагледжанасць нашых населеных пунктаў. Але калі спачатку першачарговымі аб'ектамі прыкладання сіл былі цэнтральныя вуліцы і плошчы, то цяпер трэба ісці далей, у глыб дваровых тэрыторый. Ствараючы там зоны адпачынку, спартыўныя і дзіцячыя гульнявыя пляцоўкі.

Кожны чацвер – чысты

У Наваполацку, як падкрэсліў у сваім выступленні мэр горада Дзмітрый Дзямідаў, пытанням добраўпарадкавання надаюць вялікую ўвагу. На капітальны і бягучы рамонт, цеплавую мадэрнізацыю жыллёвага фонду, дваровыя тэрыторыі і праезнай часткі ў 2015 годзе са сродкаў гарадскога бюджэту выдзелена каля 60 млрд рублёў. Устаноўлена звыш 300 адзінак дзіцячага гульнявога абсталявання і парадку 70 малых архітэктурных форм, адрамантаваны каля 2 тыс. кв. м тратуараў і праездаў уздоўж жылых дамоў, асфальтавае пакрыццё на 103 дваровых тэрыторыях.

Эканоміка нафтаграда сёння захоўвае станоўчую дынаміку развіцця, але бюджэтных сродкаў для вырашэння ўсіх праблем, на жаль, недастаткова. Таму ў мерапрыемствах актыўна ўдзельнічаюць суб'екты гаспадарання і гараджане. Да прыкладу, такія прадпрыемствы, як «Наваполацкводаканал», «Полацкгаз», «ЛЮАЛ», «Лайнер», уласнымі сіламі ўсталявалі малыя архітэктурныя формы на дзіцячых пляцоўках у дварах, а КУП ЖРЭА – спартыўны гульнявы комплекс.

У красавіку і кастрычніку ў Наваполацку праводзяцца месячнікі па добраўпарадкаванні тэрыторый, месцаў масавага адпачынку, водаахоўных зон. У маі гэтага года адбылася акцыя «Чысты лес», у сакавіку і жніўні – агульнагарадскія суботнікі. Заробленыя на іх грошы пайшлі на рамонт звыш 4 тыс. кв. м асфальтавага пакрыцця тэрыторыі каля фантана каля музычнай школы і пешаходных дарожак у скверы каля СШ №4.

Кожны чацвер у горадзе дзейнічае адзіны санітарны дзень. Як ён выконваецца, правяраюць падчас рэйдаў, вынікі якіх разглядаюць на апаратных нарадах у гарвыканкаме з запрашэннем датычных асоб. Традыцыйным стала правядзенне агульнагарада-скага агляду-конкурсу сярод прадпрыемстваў і арганізацый на лепшае добраўпарадкаванне і азеляненне.

Дэпутацкія ініцыятывы

– Толькі су-месная планамерная праца дазволіць забяспечыць прыгожы, дагледжаны выгляд горада ва ўсіх яго мікрараёнах, – адзначыў старшыня гарадскога Савета дэпутатаў Вячаслаў Дурноў, які расказаў, наколькі энергічна ў Наваполацку дзейнічаюць народныя абраннікі. Яны і смецце на суботніках прыбіраюць, і дрэвы высаджваюць, і, вядома ж, з'яўляюцца каардынатарамі вырашэння паўсядзённых людскіх праблем, прадуктыўна ўзаемадзейнічаючы з органамі ўлады і гарадскімі службамі. Менавіта з улікам зваротаў і пажаданняў грамадзян выконваюцца работы па добраўпарадкаванні большай часткі дваравых тэрыторый.

Па ініцыятыве і пры персанальнай падтрымцы дэпутата Аляксея Ларына, дырэктара «Наваполацкводаканала», былі ўстаноўлены новыя дзіцячыя гульнявыя пляцоўкі на чатырох дваравых тэрыторыях. Дырэктар завода «Палімір» Алег Жабін асабіста прымаў актыўны ўдзел у арганізацыі збору грашовых сродкаў на дабрачынныя мерапрыемствы, а Мікалай Пілімон, які ўзначальвае ААТ «ПСК-1», арганізуе гэту працу сярод прадпрымальнікаў.

Савет дэпутатаў забяспечвае ўзгодненую дзейнасць органаў тэрытарыяльнага грамадскага самакіравання, якія, як падкрэслівалася на пасяджэнні, не проста існуюць на паперы, а рэальна ўдзельнічаюць у добраўпарадкаванні месцаў пражывання. Акрамя таго, з цікавымі пачынаннямі актыўна выступае моладзевы парламент, аб дзейнасці якога на пасяджэнні распавёў яго старшыня Глеб Несцярэнка.

Прыгажосць і соцыум ствараюць самі

У Наваполацку працуюць 8 саветаў мікрараёнаў, у якія ўваходзяць 409 дамавых камітэтаў, абрана 696 старэйшын пад'ездаў. У цэлым гэта звыш тысячы чалавек грамадскага актыву – неабыякавых людзей, якія натхняюць на добрыя справы сваіх суседзяў.

Сярод іх і выступіўшая на пасяджэнні старшыня савета мікрараёна №8 Галіна Грамыка. Двор дома, дзе яна пражывае (вуліца Васілеўцы, 1), ужо не раз перамагаў у гарадскім конкурсе на лепшае добраўпарадкаванне. Там не толькі квітнеюць кветкі на клумбах, але і створана маленькая экасістэма ў выглядзе сажалкі з жывымі рыбамі. За кошт уласных сродкаў (штомесячныя ахвяраванні 30 тысяч рублёў) жыльцы абсталявалі тратуар з бардзюрам, усталявалі прыгожы дызайнерскі плот, праявілі творчасць у добраўпарадкаванні кожнага кутка тэрыторыі. Стварылі ўтульнасць і ў пад'ездах, дзе на вокнах вісяць фіранкі, а сцены размаляваныя.

– Для чалавека натуральна прыводзіць у парадак месца, дзе ён жыве, – кажа Галіна Уладзіміраўна, успамінаючы вядомую цытату з аповесці Экзюперы «Маленькі прынц»: «Прачнуўся раніцай – прыбяры сваю планету».

Красномоўныя прыклады такога падыходу ўдзельнікі выязнога пасяджэння ўбачылі падчас наведвання аб'ектаў нафтаграда. Яны пабывалі ў гарадскім скверы, на спартыўнай пляцоўцы СДЮШАР №2, у узорных дварах на вуліцах Школьнай і Маладзёжнай, пазнаёміліся з перспектывамі добраўпарадкавання тэрыторый ААТ «Полацктранснафта Дружба» і ходам будаўніцтва ў восьмым мікрараёне ясляў-сада-пачатковай школы. Каб уводу ў строй гэты унікальны аб'ект да 1 верасня 2016 года, неабходна дапамога вобласці, і яна падчас візіту была абяцаная.

У цэлым члены прэзідыума далі высокую ацэнку праведзенай у Наваполацку працы і рэкамендавалі вопыт для распаўсюджвання ў іншых рэгіёнах Віцебшчыны.

Ларыса Малашаня. Фота аўтара і Антона Сцепанішчава, "Віцебскія весці".