Узровень злачынстваў сярод замежнікаў у Віцебскай вобласці знізіўся за студзень-чэрвень на 19%

Узровень злачыннасці сярод замежнікаў знізіўся ў Віцебскай вобласці за студзень-чэрвень на 19% да 98 фактаў, паведаміў карэспандэнту БЕЛТА начальнік арганізацыйна-кантрольнага аддзела пракуратуры Віцебскай вобласці Ігар Багачоў. Паводле яго слоў, значны ўплыў на зніжэнне колькасці злачынстваў, учыненых замежнымі грамадзянамі, аказалі жорсткі кантроль за іх знаходжаннем на тэрыторыі вобласці і актыўнае прымяненне норм адміністрацыйнага заканадаўства. Касаючыся апошняга, Ігар Багачоў падкрэсліў, што толькі за першае паўгоддзе ў дачыненні да жыхароў іншых дзяржаў складзена звыш 12 тыс. адміністрацыйных пратаколаў, у тым ліку за парушэнні правілаў знаходжання ў Беларусі і правілаў транзітнага праезду праз тэрыторыю нашай краіны да адміністрацыйнай адказнасці прыцягнута 574 асобы. У дачыненні да 138 – якія груба парушылі заканадаўства або незаконна знаходзяцца на тэрыторыі краіны – вынесены і рэалізаваны рашэнні аб дэпартацыі або высылцы, з іх 63 – пад канвоем. За парушэнне тэрміну забароны на ўезд у Беларусь у дачыненні да 14 замежнікаў узбуджаны крымінальныя справы па арт.371 ч.2 КК РБ. Усяго ў Віцебскай вобласці на ўліках у падраздзяленнях па грамадзянстве і міграцыі знаходзяцца больш за 20 тыс. замежных грамадзян і 1,8 тыс. асоб без грамадзянства, якія пастаянна пражываюць у рэгіёне, з іх 14,8 тыс. складаюць грамадзяне Расійскай Федэрацыі і 539 – асобы без грамадзянства з Расіі. За 6 месяцаў часовую рэгістрацыю аформілі 4,1 тыс. замежнікаў, 1,5 тыс. выдадзены дазволы на часовае пражыванне, з хадайніцтвам аб выдачы дазволаў на пастаяннае пражыванне ў Беларусі звярнуліся 824 чалавекі. Эфектыўна супрацьдзейнічаць незаконнай міграцыі супрацоўнікам праваахоўных органаў дазваляе аб'ёмная прававая база: рэгуляванню прававога статусу замежнікаў у Беларусі прысвечана каля 30 нарматыўных прававых актаў. Ігар Багачоў абазначыў таксама асаблівую ролю ў гэтым узаемадзеяння, наладжанага з праваахоўнымі органамі прыгранічных рэгіёнаў Расіі. Напрыклад, толькі з пачатку гэтага года на тэрыторыі прыгранічных раёнаў Віцебскай вобласці ва ўзаемадзеянні з прыгранічнымі раёнамі Расійскай Федэрацыі праведзена 13 рэжымна-прафілактычных мерапрыемстваў.-0-