Наваполацк будуе ўстаноўку павольнага каксавання нафтавых рэшткаў

Больш за дзвесці работнікаў наваполацкага ААТ «Нафтазаводамантаж» і 14 яго субпадрадных арганізацый задзейнічаны на будаўніцтве ўстаноўкі запаволенага каксавання нафтавых рэшткаў у ААТ «Нафтан». У свеце такіх установак усяго восем, да канца 2018 года яшчэ адну плануецца запусціць на Віцебшчыне. Яна дазволіць паглыбіць перапрацоўку нафты да 92–93% і значна павялічыць прадукцыйнасць.

«Нафтазаводамантаж» – спецыялізаваная генпадрадная арганізацыя, якая выконвае ўсе віды механіка-мантажных і будаўнічых работ, яна задзейнічана на аб'ектах нафтахімічнай і хімічнай прамысловасці.

Асноўны заказчык сёння – «Нафтан», з ім заключаны дагаворы генпадраду па 9 аб'ектах новага будаўніцтва, найважнейшымі з якіх з'яўляюцца ўстаноўка запаволенага каксавання цвёрдых нафтавых рэшткаў і ўстаноўка першаснай перапрацоўкі нафты АТ-8. На іх сканцэнтраваны практычна ўсе сілы ААТ «Нафтазаводамантаж». І аб'ёмы работ сапраўды ўражваюць. Так, на рэканструкцыі АТ-8, якая дазволіць значна скараціць энергазатраты «Нафтана», ужо асвоена больш за 554 млрд. недэнамінаваных рублёў, устаноўлена 619 адзінак новага абсталявання, добраўпарадкавана амаль 3 тыс. кв. м тэрыторыі. За экватар перавалілі работы па будаўніцтве ўстаноўкі запаволенага каксавання – асвоена амаль 700 млрд. руб.

Працуюць спецыялісты «Нафтазаводамантажа» і за мяжой – у Туркменістане, на найбуйнейшым у Сярэдняй Азіі Гарлыкскім радовішчы калійных соляў, дзе беларусы ўзводзяць горна-абагачальны камбінат.

— Па выніках 2015 года наша прадпрыемства прадэманстравала станоўчую дынаміку, — паведаміў намеснік генеральнага дырэктара Канстанцін Каралёў. – Рэнтабельнасць рэалізаванай прадукцыі склала 12,7%, аб'ёмы вытворчасці работ выраслі на 26%, сярэдні заробак дасягнуў каля 10 млн. рублёў. Залог поспеху – высокія тэхналогіі, пастаянная мадэрнізацыя, на якую штогод траціцца больш за 20 млрд. рублёў, і дастаткова вузкая спецыялізацыя. Сёння мы канкурэнтаздольныя на рынку,працуем з замежнымі партнёрамі, у тым ліку па еўрапейскіх стандартах, маем акрэдытаваную зварачную лабараторыю. Па выніках 2015 года акцыянернае таварыства занесена на абласную Дошку гонару.

Аляксандр Кутынко, «Віцебскія весці».