У Беларусі будзе забаронена выкладка ў вітрынах тытунёвых вырабаў

У гандлёвых аб'ектах з 1 ліпеня 2015 года будзе забаронена выкладка ў вітрынах і на іншым гандлёвым абсталяванні тытунёвых вырабаў (іх узораў). Пра гэта заявіла журналістам намеснік міністра гандлю Ірына Наркевіч на прэс-канферэнцыі, прысвечанай Дню спажыўца, які будзе адзначацца ў Беларусі 15 сакавіка.

"Інфармацыю аб тытунёвых вырабах у гандлёвых аб'ектах і аб'ектах грамадскага харчавання можна будзе размяшчаць толькі ў выглядзе пераліку тытунёвых вырабаў з указаннем іх наймення і цэн. Гэта значыць, мы клапоцімся пра здароўе нашых людзей, але пры гэтым не абмяжоўваем правы курца - калі ён вырашыў паліць, ён мае на гэта права", - адзначыла Ірына Наркевіч.

Таксама, па яе словах, будзе забаронена вытворчасць і абарот некурыльных тытунёвых вырабаў, прызначаных для смактання, вырабленых з тытуню і нетытунёвай сыравіны. Акрамя таго, пад забарону трапіць вытворчасць і продаж тавараў, якія імітуюць знешні выгляд або выкарыстоўваюць у сваіх найменнях найменні відаў тытунёвых вырабаў.

Згодна з законам "Аб рэкламе" ў Беларусі цалкам забаронена рэклама тытунёвых вырабаў, вызначаны месцы, дзе нельга рэкламаваць алкагольныя і слабаалкагольныя напоі, піва, а таксама ўведзены абмежаванні да зместу дазволенай рэкламы такой прадукцыі.

Намеснік міністра канстатавала, што прымаемыя меры па барацьбе з тытунекурэннем і алкагалізмам даюць станоўчы эфект. У 2014 годзе продаж тытунёвых вырабаў у Беларусі знізіўся на 9,4% да ўзроўню папярэдняга года, алкагольных напояў - на 7%. Пры гэтым беларускія спажыўцы робяць выбар на карысць натуральнага алкаголю - напрыклад, продажы вінаградных він павялічыліся на 3,4%, а гарэлкі, лікёраў і іншых спіртных напояў было рэалізавана на 10% менш.

Юлія Дыленок - БЕЛТА