У Беларусі будуць павялічаны гранічныя адпускныя цэны на ялавічыну і свініну

24 мая, Мінск /Таццяна Чумакова - БЕЛТА/. У Беларусі будуць павялічаны гранічныя адпускныя цэны на ялавічыну і свініну. Аб гэтым паведамілі карэспандэнту БЕЛТА ў прэс-службе Міністэрства эканомікі, каментуючы пастанову Мінэканомікі ад 27 красавіка 2011 года №65 "Аб цэнах на сацыяльна значныя тавары і прызнанні страціўшымі сілу некаторых пастаноў Міністэрства эканомікі Рэспублікі Беларусь". У адпаведнасці з пастановай, у маі-чэрвені бягучага года прадугледжана павелічэнне гранічных максімальных адпускных цэн на ялавічыну тушаваную - на 10% і свініну тушаваную - на 8%. У прэс-службе міністэрства адзначылі, што павышэнне цэн звязана са значным ростам закупачных цэн на буйную рагатую жывёлу і свіней і прапанавана Мінсельгасхарчам. Пастанова Мінэканомікі №65 уступіць у сілу з 25 мая бягучага года. Дадзенай пастановай прадугледжана захаванне рэгулявання і ўстанаўленне гранічных максімальных адпускных цэн на асноўныя сацыяльна значныя прадукты харчавання, адзначылі ў прэс-службе Мінэканомікі. Гаворка ідзе пра хлеб жытні, жытнёва-пшанічны, батоны і хлебцы з пшанічнай мукі няздробленыя вагой 300 г і больш. Да такіх прадуктаў харчавання адносіцца таксама малако каровіна пастэрызаванае і кефір з каровінага малака тлустасцю да 3,5% уключна, смятана тлустасцю да 25% уключна, тварог тлустасцю да 9% уключна без смакавых дабавак і напаўняльнікаў, мяса (ялавічына і свініна). Узровень гранічных максімальных адпускных цэн на пералічаныя віды хлебабулачных тавараў, малака і малочных тавараў захаваны на дзеючым узроўні, падкрэслілі ў прэс-службе Мінэканомікі. Рэгуляванне рознічных цэн па некаторых групах малочных прадуктаў захоўваецца шляхам устанаўлення гранічных максімальных гандлёвых надбавак (з улікам аптовай надбаўкі). У прэс-службе ўдакладнілі, што гаворка ідзе пра тварог, які вырабляецца па палепшаных тэхналогіях у герметычнай упакоўцы і фальзе, тварог зерневы і камбінаваны з іншымі харчовымі прадуктамі, малако і кефір, упакаваныя ў бутэлькі з поліэтылентэрафталату, смятану ў палістыролавых шкляначках, вырабленых метадам тэрмафармавання арганізацыямі-вытворцамі малочнай прадукцыі на тэрыторыі Беларусі. Фарміраванне адпускных цэн на пералічаныя тавары ажыццяўляецца арганізацыямі-вытворцамі з улікам кан'юнктуры рынку. Па асобных пазіцыях хлебабулачных і малочных тавараў, якія маюць абмежаваны круг спажыўцоў і не носяць сацыяльнай накіраванасці, прадпрыемствы перапрацоўчай прамысловасці могуць фарміраваць цэны зыходзячы са складваючайся кан'юнктуры рынку. Гэта хлебы заварныя з выкарыстаннем дадатковай сыравіны замежнага паходжання, хлеб для тостаў, булачныя вырабы з начынкамі і вагой менш за 300 г, асновы для піцы, лавашы і ляпёшкі, дыетычныя і ўзбагачаныя хлебабулачныя вырабы, хлебабулачныя вырабы для харчавання спартсменаў; высокатлустыя малочныя прадукты, малочныя прадукты з іншых відаў малака, акрамя каровінага, а таксама з рознымі смакавымі дабаўкамі і напаўняльнікамі, удакладнілі ў прэс-службе Мінэканомікі. Як адзначылі ў прэс-службе міністэрства, пастанова №65 была распрацавана ў рамках прывядзення заканадаўства ў адпаведнасць з пастановай Савета Міністраў Беларусі ад 14 красавіка 2011 года № 495.-0-