У Беларусі змяніўся парадак прыёму экзаменаў на права кіравання транспартным сродкам

У Беларусі ўнесены змяненні ў Інструкцыю аб парадку прыёму кваліфікацыйных экзаменаў на права кіравання механічным транспартным сродкам (за выключэннем колавых трактароў). Такое рашэнне змяшчаецца ў пастанове Міністэрства ўнутраных спраў ад 3 красавіка 2015 года № 93, апублікаваным сёння на Нацыянальным прававым інтэрнэт-партале, паведамляе БЕЛТА.

Пастановай вызначаны парадак прыёму экзаменаў: спачатку тэарэтычны, затым практычны. Асоба, якая здала тэарэтычны экзамен, дапускаецца да здачы практычнага экзамену на працягу наступных 6 месяцаў, па заканчэнні якіх тэарэтычны экзамен прызначаецца зноў. Практычны экзамен на навучальным аўтамабілі прымаецца ў два этапы: першы - на аўтадроме, другі - на выпрабавальным маршруце ва ўмовах рэальнага дарожнага руху. Паўторна экзамены прызначаюцца не раней чым праз шэсць дзён з дня, наступнага за днём апошняга экзамену.

Для тых, хто не здаў тэарэтычны экзамен альбо адзін з этапаў практычнага экзамену з трэцяй і наступных спроб, паўторны экзамен прызначаецца не раней чым праз 30 дзён. У выпадку непрадстаўлення экзаменацыйнай карткі па тэарэтычным і практычным экзаменах у РЭП для атрымання пасведчання кіроўцы на працягу трох гадоў тэарэтычны і практычны экзамены прызначаюцца зноў.

Тэарэтычны экзамен, які прымаецца па білетах з выкарыстаннем аўтаматызаваных сістэм, павінен доўжыцца не больш за пятнаццаць хвілін, а па білетах на папяровым носьбіце - не больш за трыццаць хвілін. Рашэнне аб прыёме тэарэтычнага экзамену па білетах на папяровым носьбіце прымаецца старшынёй камісіі па ўзгадненні з экзаменатарамі. Станоўчая адзнака "здаў" выстаўляецца ў тым выпадку, калі экзаменуемы дапусціў не больш аднаго няправільнага адказу. Асобам, якія на працягу ўказанага часу адказалі не на ўсе пытанні экзаменацыйнага білета, выстаўляецца адзнака "не здаў".

Акрамя таго, цяпер пры здачы практычнага экзамену дазволена карыстацца радыёэлектроннай прыладай для навігацыі (GPS-навігатарам). Рашэнне аб яго выкарыстанні прымае старшыня камісіі па ўзгадненні з экзаменатарамі. Экзаменатарам перад пачаткам прыёму экзамену ўносіць выпрабавальны маршрут у GPS-навігатар.

Апеляцыю цяпер можна будзе падаваць толькі адзін раз, паўторная апеляцыя разгляду не падлягае і вяртаецца экзаменуемаму.

Пастанова ўступае ў сілу пасля яе афіцыйнага апублікавання.