У Беларусі ствараецца сістэма забеспячэння бяспекі харчовых прадуктаў у ланцугу «ад фермы – да стала»

5 красавіка, Мінск /Лілія Крапіўная - БЕЛТА/. У Беларусі ствараецца сістэма забеспячэння бяспекі харчовых прадуктаў на працягу ўсяго ланцуга "ад фермы - да стала". Адным са крокаў на шляху да гэтай сістэмы з'яўляецца ўвядзенне з 1 студзеня 2011 года тэхнічных рэгламентаў на малако і малочную прадукцыю, а таксама на фасованыя тавары ў пакаванні. Аб гэтым паведамілі карэспандэнту БЕЛТА ў прэс-службе Дзяржаўнага камітэта па стандартызацыі, каментуючы пастановы ўрада, якімі зацверджаны гэтыя рэгламенты. Пастановай Саўміна ад 25 сакавіка 2010 года №431 зацверджаны тэхнічны рэгламент Рэспублікі Беларусь "Малако і малочная прадукцыя. Бяспека" (ТР 2010/018/BY), пастановай ад 24 сакавіка 2010 года №424 - тэхнічны рэгламент "Фасованыя тавары ў пакаванні. Патрабаванні да колькасці тавару і маркіроўкі" (ТР 2010/004/BY). У праграме распрацоўкі тэхнічных рэгламентаў Беларусі на перыяд да 2011 года нададзена асаблівая ўвага харчовай галіне, адзначылі ў Дзяржстандарце. У цэлым прадугледжваецца стварэнне сістэмы тэхнічнага рэгулявання харчовых прадуктаў на падставе сямі тэхнічных рэгламентаў і ўзаемазвязаных з імі дзяржаўных стандартаў. Дадзены комплекс дакументаў дазволіць стварыць сістэму забеспячэння бяспекі харчовых прадуктаў на працягу ўсяго харчовага ланцуга "ад фермы - да стала" аналагічна дзеючай у Еўрасаюзе. Гэтыя рэгламенты датычацца агульнай бяспекі харчовых прадуктаў, маслапрадуктаў, мяса і мясной прадукцыі, патрабаванняў да фасованых тавараў, вады пітной, расфасаванай у спажывецкую тару, а таксама бяспекі дзіцячага харчавання. Што тычыцца тэхнічнага рэгламенту на малако і малочную прадукцыю і іх бяспеку, то ён распрацаваны на аснове заканадаўчых актаў Еўрапейскага саюза ў галіне забеспячэння бяспекі харчовых прадуктаў і федэральнага закона Расіі "Тэхнічны рэгламент на малако і малочную прадукцыю" і накіраваны на забеспячэнне неабходнага ўзроўню абароны жыцця, здароўя і спадчыннасці чалавека, аховы навакольнага асяроддзя, а таксама папярэджанне дзеянняў, якія ўводзяць у зман спажыўцоў малака і малочнай прадукцыі адносна іх бяспекі, прызначэння і якасці. Распрацоўка дадзенага дакумента вялася Дзяржстандартам, БелДІСС сумесна з рабочай групай у складзе прадстаўнікоў Мінздароўя, Мінсельгасхарча, а таксама шэрагу айчынных прадпрыемстваў па перапрацоўцы малака. Тэхнічны рэгламент распаўсюджваецца на малако і малочную прадукцыю, якія выпускаюцца ў абарот у Беларусі, а таксама на функцыянальна неабходныя кампаненты, якія выкарыстоўваюцца пры вытворчасці прадуктаў перапрацоўкі малака. У сферу прымянення дадзенага рэгламенту не ўваходзяць малако і малочная прадукцыя, атрыманыя ў працэсе хатняй вытворчасці і прызначаныя для хатняга выкарыстання, а таксама матэрыялы, якія кантактуюць з харчовымі прадуктамі, патрабаванні да якіх будуць устаноўлены ў адпаведным спецыяльным тэхнічным рэгламенце. ТР 2010/018/BY устанаўлівае абавязковыя для выканання патрабаванні бяспекі да малака і малочнай прадукцыі, працэсаў іх вытворчасці, захоўвання, перавозкі, рэалізацыі, да пакавання і маркіроўкі, а таксама правілы размяшчэння на рынку, адказнасць і дзяржаўны нагляд. Так, нароўні з агульнымі патрабаваннямі да сырога малака, прызначанага для вытворчасці прадуктаў дзіцячага харчавання на малочнай аснове, стэрылізаванага малака, сыру, прадуктаў дыетычнага харчавання, прад'яўляецца шэраг дадатковых патрабаванняў. Комплекс патрабаванняў датычыцца персаналу арганізацый, чыя дзейнасць звязана з вытворчасцю, захоўваннем, перавозкай і рэалізацыяй малака і малочнай прадукцыі, непасрэдна вытворчасці, вытворчых памяшканняў, тэхналагічных працэсаў, арганізацыі вытворчага кантролю. Перад размяшчэннем на рынку малако і малочная прадукцыя павінны быць падвергнуты працэдуры пацвярджэння адпаведнасці дадзенаму тэхнічнаму рэгламенту, якая праводзіцца ў форме дэкларавання або сертыфікацыі. Сертыфікаты адпаведнасці і дэкларацыі аб адпаведнасці, выдадзеныя (прынятыя) да ўступлення ў сілу ТР 2010/018/BY, дзейнічаюць на працягу тэрмінаў, устаноўленых Дзяржстандартам, але не больш за тэрміны прыдатнасці малака і малочнай прадукцыі, якія знаходзяцца ў абароце на дату ўступлення ў сілу тэхнічнага рэгламенту. Мінсельгасхарчам сумесна з зацікаўленымі будзе распрацаваны і зацверджаны план мерапрыемстваў па ўвядзенні ў дзеянне тэхнічнага рэгламенту, а Дзяржстандартам сумесна з Мінздароўем зацверджаны пералік узаемазвязаных тэхнічных нарматыўных прававых актаў і забяспечана ў далейшым яго пастаянная актуалізацыя. Пры распрацоўцы тэхнічнага рэгламенту ЕўрАзЭС "Малако і малочная прадукцыя" Дзяржстандарту, Мінсельгасхарчу, Мінздароўю даручана забяспечыць давядзенне пазіцыі беларускага боку да зацікаўленых.-0-