У Беларусі ў 2009 годзе ўпершыню за 20 гадоў зарэгістравана зніжэнне захворвання на ІППП

16 верасня, Віцебск /Сяргей Кочатаў - БЕЛТА/. У Беларусі ў 2009 годзе ўпершыню за апошнія 20 гадоў зафіксавана зніжэнне захворвання на інфекцыі, якія перадаюцца палавым шляхам (ІППП), паведаміў карэспандэнту БЕЛТА галоўны пазаштатны дэрматавенералагічны спецыяліст Міністэрства аховы здароўя Беларусі, дацэнт кафедры скурных і венералагічных хвароб Беларускага дзяржаўнага медыцынскага ўніверсітэта Аляксандр Лук'янаў. Ён прымае ўдзел у міжнароднай навукова-практычнай канферэнцыі па актуальных пытаннях дыягностыкі і лячэння сацыяльна значных дэрматозаў і інфекцый, якія перадаюцца палавым шляхам, якая адкрылася сёння ў Віцебску. Па словах Аляксандра Лук'янава, зніжэнне захворвання на ІППП стала вынікам паслядоўнай працы ўсіх дзяржаўных службаў, у тым ліку дэрматавенералагічнай. Сёння ў Беларусі ідзе мадэрнізацыя лабараторнай базы, прымяняемыя стандарты дыягностыкі ІППП прыведзены ў адпаведнасць з сусветнымі нарматывамі. Ва ўсіх абласных цэнтрах працуюць лабараторыі ПЦР-дыягностыкі ў рэжыме рэальнага часу, што робіць для грамадзян даступнымі інавацыі ў лабараторнай дыягностыцы. Дэрматавенералагі сумесна з гінекёлагамі і ўролагамі вырашаюць найважнейшыя задачы, звязаныя з забеспячэннем дэмаграфічнай бяспекі краіны. У Беларусі актыўна развіваецца дэрматалогія, якая з'яўляецца дастаткова складанай галіной медыцынскай навукі і практыкі. Сёння для спецыялістаў-дэрматолагаў асноўнай задачай з'яўляецца павышэнне якасці жыцця грамадзян, якія пакутуюць дэрматалагічнымі паталогіямі, асабліва іх цяжкімі праявамі. Беларускія спецыялісты ўкараняюць, у прыватнасці, прымяненне імуна-біялагічных прэпаратаў пры лячэнні хворых з цяжкімі праявамі скурных захворванняў. Гэты напрамак атрымае актыўнае развіццё ў бліжэйшыя гады для аказання эфектыўнай дапамогі пацыентам. Двухдзённая канферэнцыя ў Віцебску прысвечана 75-годдзю кафедры дэрматавенералогіі Віцебскага дзяржаўнага медыцынскага ўніверсітэта. Мерапрыемства ў абласным цэнтры сабрала больш за 100 вядучых дэрматавенералагічных спецыялістаў, урачэй-уролагаў і касметолагаў навуковых і лячэбных устаноў, навучальных устаноў з Расіі, Украіны, Польшчы, а таксама з усіх рэгіёнаў Беларусі. Адной з асноўных тэм канферэнцыі з'яўляюцца пытанні дыягностыкі і лячэння дэрматозаў як найбольш распаўсюджаных і сацыяльна значных скурных захворванняў, якія выклікаюць паражэнні скуры і суставаў і здольныя прыводзіць да інваліднасці. У прыватнасці, спецыялісты абмяркуюць праблемы дыягностыкі цяжкіх формаў псарыязу, прымяненне новых і інавацыйных метадаў лячэння. Асобныя секцыі будуць прысвечаны разгляду актуальных праблем касметалогіі, дыягностыкі і лячэння інфекцый, якія перадаюцца палавым шляхам. Адбудзецца абмеркаванне пытанняў лячэння найбольш рэдкіх дэрматалагічных захворванняў на аснове выпадкаў з практыкі вучоных і ўрачоў лячэбных устаноў. Арганізатарамі канферэнцыі выступаюць Міністэрства аховы здароўя Беларусі і Віцебскі дзяржаўны медыцынскі ўніверсітэт.-0-