У Беларусі за студзень-красавік дасягнуты самы высокі рост ВУП за апошнія 10 гадоў - 112,3%

23 мая, Мінск /Кар. БЕЛТА/. У Беларусі за студзень-красавік 2011 года дасягнуты самы высокі рост валавога ўнутранага прадукту за апошнія 10 гадоў – 112,3%. Аб гэтым паведамілі карэспандэнту БЕЛТА ў прэс-службе Міністэрства эканомікі. Эканамічны рост падтрымліваецца дынамікай прамысловай вытворчасці (112,9%), павелічэннем аб’ёму інвестыцый у асноўны капітал (123,4%), захаваннем актыўнага попыту на спажывецкім рынку краіны (120,6%). Прырост эканомікі ў першым квартале забяспечаны ва ўмовах росту прадукцыйнасці працы на 10,6%, зніжэння энергаёмістасці ВУП на 7,7%, росту экспарту тавараў і паслуг на 41,9%. Асноўны ўклад у фарміраванне тэмпаў росту ВУП забяспечаны прамысловасцю (4,1%), відамі дзейнасці "Гандаль; рамонт аўтамабіляў, бытавых вырабаў і прадметаў асабістага карыстання" (2,9%) і "Будаўніцтва" (1,6%). Істотны ўклад у студзені-красавіку быў атрыманы па пазіцыі "Чыстыя падаткі на прадукты" (2,4%). Дынаміка прамысловай вытворчасці (112,9%) забяспечана апрацоўчай прамысловасцю (тэмп 114,9%). Высокі вынік чатырох месяцаў дасягнуты за кошт нафтаперапрацоўкі (тэмп 130,5%), уклад якой у рост прамысловай вытворчасці складае больш за траціну. Павышана загрузка нафтаперапрацоўчых прадпрыемстваў – за 4 месяцы 2011 года перапрацавана 6245,2 тыс.т нафты, што на 28% больш, чым за аналагічны перыяд 2010 года. Істотны рост у нафтаперапрацоўцы абумоўлены нізкай "базай" аб’ёмаў перапрацоўкі нафты ў першым квартале 2010 года, аднак ужо пачынаючы з красавіка 2010-га аб’ёмы перапрацоўкі нафты сталі аднаўляцца. У сувязі з чым пачынаючы з мая бягучага года рост тэмпаў вытворчасці ў секцыі "вытворчасць кокса, нафтапрадуктаў і ядзерных матэрыялаў" павінен запаволіцца, прагназуюць у Мінэканомікі. Па 9 з 14 падсекцый апрацоўчай прамысловасці назіраецца дынаміка зніжэння тэмпаў у параўнанні са студзенем 2011 года (за выключэннем вытворчасці машын і абсталявання, транспартных сродкаў і абсталявання, апрацоўкі драўніны і вырабаў з дрэва). Асноўнымі фактарамі росту прамысловай вытворчасці з'яўляюцца спрыяльная кан'юнктура на знешніх рынках, падтрыманне ўнутранага попыту і кропкавая падтрымка вядучых прадпрыемстваў. Якасныя параметры развіцця прамысловага комплексу таксама характарызуюцца станоўчай дынамікай. Адным з паказчыкаў эфектыўнасці з'яўляецца апярэджваючы рост прадукцыйнасці працы адносна тэмпаў росту вытворчасці. Такая сітуацыя па выніках студзеня-сакавіка бягучага года характэрна для 7 з 14 падсекцый апрацоўчай прамысловасці. Фактарамі росту прадукцыйнасці працы сталі як аптымізацыя колькасці працоўнага персаналу (сярэднеўзважаная колькасць работнікаў скарацілася на 0,9%, або на 7,9 тыс. чалавек), так і павелічэнне сярэднямесячнай выпрацоўкі на аднаго чалавека да Br18 млн. (за 2010 год – Br12,7 млн.). Рэнтабельнасць продажаў у прамысловасці рэспублікі ў студзені-сакавіку дасягнула 7,2%. Атрыманы арганізацыямі за тры месяцы бягучага года чысты прыбытак на 61% больш, чым за студзень-сакавік 2010 года. Доля стратных арганізацый зніжана да 16,6% ад агульнай колькасці прамысловых арганізацый. Адзначаецца тэндэнцыя росту ўдзельнай вагі адгружанай інавацыйнай прадукцыі ў агульным аб'ёме адгружанай прадукцыі: за студзень – 10%, за студзень-люты – 11,3%, за студзень-сакавік – 11,8%, за студзень-красавік – 12,3%.-0-