У Беларусі забаронена распіццё піва ў грамадскіх месцах

23 лютага, Мінск /Васіль Малашэнкаў - БЕЛТА/. У Беларусі забаронена распіццё піва ў грамадскіх месцах. Аб гэтым карэспандэнту БЕЛТА паведамілі ў МУС. Сёння ўступаюць у сілу змяненні ў КоАП Беларусі. У тым ліку новы варыянт арт.17.3 гаворыць, што распіццё алкагольных і слабаалкагольных напояў (з аб'ёмнай доляй этылавога спірту ад 0,5% да 7%) або піва на вуліцы, стадыёне, у скверы, парку, грамадскім транспарце або ў іншых грамадскіх месцах забаронена. Аднак гэта не датычыцца месцаў, якія спецыяльна прызначаны для ўжывання алкаголю (бараў, рэстаранаў і г.д.). За парушэнне артыкула прадугледжаны штраф у памеры да васьмі базавых велічынь (цяпер да Br280 тыс.). Як адзначылі ва УУС на транспарце МУС, ужыванне піва забаронена і ў пасажырскіх самалётах нацыянальнай авіякампаніі "Белавія". Пры гэтым пасажыры бізнес-класа ўсё ж могуць ужываць алкаголь у колькасцях, дазволеных правіламі гэтай авіякампаніі. Забарона на распіццё піва закранула пасажырскія цягнікі, а таксама аб'екты чыгуначнага транспарту Беларусі. Да апошніх адносяцца прыпыначныя пункты, станцыі і вакзалы. У транспартнай міліцыі нагадалі, што і раней у купэ і плацкартах насуперак распаўсюджанаму заблуджэнню нельга было распіваць моцныя спіртныя напоі. Многія грамадзяне альбо ігнаравалі гэта патрабаванне, альбо проста не ведалі. Закон будзе дзейнічаць і ў наступных па тэрыторыі Беларусі замежных цягніках, у адрозненне ад самалётаў замежных кампаній. У той жа час спіртное ў цягніках па-ранейшаму можна будзе ўжываць у вагонах-рэстаранах. Акрамя таго, цяпер работнікі міліцыі змогуць складаць пратаколы за знаходжанне на працоўным месцы ў стане алкагольнага, наркатычнага або таксікаманаўскага ап'янення. За гэта таксама прадугледжаны штраф - ад адной да дзесяці базавых велічынь (Br35 тыс. - Br350 тыс.). Але калі ўсе гэтыя дзеянні здзяйсняюцца паўторна на працягу аднаго года, то парушальнік заплаціць ад двух да пятнаццаці базавых велічынь (Br70 тыс. - Br525 тыс.). Таксама ў яго дачыненні можа быць ужыты адміністрацыйны арышт.-0-