У Беларусі завяршаецца вылучэнне кандыдатаў у дэпутаты Палаты прадстаўнікоў

Вылучэнне кандыдатаў у дэпутаты Палаты прадстаўнікоў Нацыянальнага сходу сёмага склікання завяршаецца 7 кастрычніка.

Прэтэндаваць на месца ў парламенце мае права чалавек, якому споўніўся 21 год. Неабходна таксама пастаянна пражываць у Беларусі, не мець судзімасцяў. Вылучацца можна трыма спосабамі: шляхам збору подпісаў (іх трэба не менш за тысячу), ад палітычнай партыі, працоўнага калектыву. Заканадаўства дазваляе выбраць адзін ці некалькі спосабаў.

Паводле даных на 4 кастрычніка, кандыдатамі ў дэпутаты вылучыліся 283 чалавекі. Усяго ў выбарчыя камісіі да гэтага часу паступіла 340 камплектаў дакументаў ад удзельнікаў выбарчай гонкі. Палітычныя партыі паспелі вылучыць 172 патэнцыйных кандыдатаў у дэпутаты, або 50,6% ад іх агульнай колькасці. Шляхам збору подпісаў вылучылася 28,5% кандыдатаў у дэпутаты. Крыху менш вылучэнцаў ад працоўных калектываў - 20,9%.

Жанчын сярод прэтэндэнтаў на дэпутацкія партфелі, паводле інфармацыі на 4 кастрычніка, 24,4%, маладых людзей да 30 гадоў - 6,4%. Перавыбрацца паспрабуюць 20 дэпутатаў Палаты прадстаўнікоў дзеючага склікання (7,1%). Патрапіць у парламент паспрабуюць і дэпутаты мясцовых Саветаў, іх 14,1% ад агульнай колькасці вылучэнцаў. Што тычыцца прафесійнай дзейнасці вылучэнцаў, то занятых у прамысловасці, будаўніцтве, сферы транспарту сярод іх 18,4%, прадстаўнікоў навукі, адукацыі, аховы здароўя, культуры і спорту - 18%, прадпрымальнікаў - 9,5%.

Рэгістрацыя кандыдатаў у дэпутаты пройдзе 8-17 кастрычніка.

Выбары ў Палату прадстаўнікоў прызначаны на 17 лістапада, у Савет Рэспублікі - на 7 лістапада.

БЕЛТА.