У беларускім войску па кантракце служаць каля ста прызыўнікоў

Змены ў Закон "Аб воінскім абавязку і воінскай службе" з'явіліся год таму. Раней у Беларусі служыць па кантракце мог толькі той, хто мінімум паўгода быў тэрміновикам. Цяпер прызыўнікі маюць выбар: маючы патрэбную для арміі спецыяльнасць, можна адразу прайсці адбор для кантракту. А гэта значыць жыць дома ці ў інтэрнаце і атрымліваць зарплату. Праўда, служыць трэба два гады, а не паўтара ці год, як выпускнікі ВНУ.

Механізм адбору зацверджаны ў сакавіку 2014 года, удакладніў палкоўнік Уладзімір Макараў, начальнік упраўлення інфармацыі – прэс-сакратар галоўнага ўпраўлення ідэалагічнай працы Міністэрства абароны:

– З мэтай павелічэння колькасці кантрактнікаў у краіне ўпершыню дазволілі прымаць прызыўнікоў (гэта значыць грамадзян мужчынскага полу прызыўнага ўзросту, якія не знаходзяцца ў запасе) на ваенную службу на пасады салдат і сяржантаў. На сённяшні дзень ва Узброеных сілах так служаць каля ста чалавек.

Напрыклад, у 228-м асобным палку радыёэлектроннай барацьбы, які дыслацыруецца ў Полацку, за год заключылі кантракт з дзевяццю прызыўнікамі, двое з іх завочна атрымліваюць вышэйшую адукацыю. Хлопцы служаць радавымі, зарплата – каля 5 мільёнаў рублёў.

Важны момант: у выпадку грубай правіннасці або сур'ёзнага дысцыплінарнага парушэння такія ваеннаслужачыя адразу пераводзяцца на тэрміновую службу і, незалежна ад таго, колькі ім засталося да канца кантракту – нават два дні, пачынаюць з нуля. То бок служаць поўны тэрмін.

У арміі патрэбны сувязісты, кіроўцы (асабліва з катэгорыяй "С"), электрыкі, слесары, кранаўшчыкі, зваршчыкі, санінструктары, музыкі. Калі маеце прыдатную спецыяльнасць, валодаеце добрым здароўем, фізічнай формай і ніколі не былі судзімыя, звяртайцеся ў райваенкамат па месцы ўліку.

Вольга Кручэнкава, СБ Беларусь сегодня