У Бешанковічах прадставілі новага кіраўніка раёна
– Калі няма моцнага лідара, то не будзе і моцнага калектыву, – перакананы старшыня аблвыканкама Мікалай Шарснёў. Напяваючы новага кіраўніка раёна, ён парэкамендаваў працаваць удумліва, на перспектыву, не загразнуўшы ў бягучцы, без паказухі.
На жаль, канстатаваў Мікалай Мікалаевіч, Віцебская вобласць сёння з'яўляецца датацыйнай. Мы выкарыстоўваем грошы, якія нам прадастаўляе дзяржава, гэта значыць трацім больш, чым зарабляем. Не з'яўляецца выключэннем і Бешанковіцкі раён. Да прыкладу, у 2016 годзе ў бюджэт раёна паступіла 19,8 млн рублёў, 49,8% з іх – датацыі. П５лівае ў гэтым годзе рэгіён і па асноўных паказчыках, але да канца года яшчэ ёсць час сканцэнтравацца і падцягнуцца, а патэнцыял і рэзервы тут маюцца.
– Але трэба дасягаць паказчыкаў не дзеля іх саміх, а дзеля таго, каб папаўняўся бюджэт і ў выніку паляпшалася якасць жыцця насельніцтва, – падкрэсліў старшыня аблвыканкама.
Можна гаварыць пра розныя паказчыкі ў сельскай гаспадарцы, прамысловасці і гэтак далей, але ўсё зводзіцца да матэрыяльнага складніка. А пакуль статыстыка кажа пра тое, што моладзь з'язджае ў пошуках працоўных месцаў з годнай заработнай платай, каб была магчымасць утрымліваць маладую сям'ю, бо добра жыць хоча кожны.
– Нягледзячы на цяжкасці, у Беларусі захавана сацыяльная накіраванасць бюджэту. У структуры выдаткаў удзельная вага фінансавання сацыяльнай сферы 76,6%. Але нам хацелася б, каб і ў бальніцах, і ў паліклініках умовы былі лепшыя. Школы ў нас таксама пакуль не на вышэйшым узроўні, не ўсюды абсталяваны сучасныя класы. Таму сродкі павінны ўкладвацца кропкава. Не можам пераабсталяваць цэлую школу? Давайце ўкладзем грошы ў адзін клас, але зробім яго з іголачкі. Міграцыя працаздольнага насельніцтва – гэта лакмусавая паперка нашай працы, – настаўляў новага старшыню райвыканкама Мікалай Шарснёў.
Работа ўлады будзе ацэньвацца па тым, наколькі ахвотна людзі застаюцца, створаны працоўныя месцы, умовы для заробку грошай, ёсць дзе атрымаць адукацыю, правесці вольны час.
Старшыня аблвыканкама таксама акцэнтаваў увагу на тым, што паказчыкі ў сельскай гаспадарцы вобласці можна падвоіць і патроіць, калі ўдасканальваць тэхналогіі.
– Чаму ў скандынаўскіх краінах атрымліваюць ураджай 90 цэнтнераў збожжа з гектара, а мы не ўсюды дацягваем да 30? Чаму там надояць 10 – 11 тон малака на карову, а ў нас 3 – 4? Значыць, нешта мы робім няправільна, – падкрэсліў кіраўнік вобласці.
Мікалай Шарснёў нацэліў і на развіццё прамысловасці, прычым не толькі вялікіх вытворчасцей. Трэба ствараць умовы, дапамагаць кожнаму, хто жадае арганізаваць сваё прадпрыемства, няхай гэта будзе дробны ці сярэдні бізнес, і не ствараць бюракратычных перашкод.
Андрэй Булаўкін падзякаваў за аказаны яму давер дэпутатаў, старшыню аблвыканкама і Прэзідэнта Рэспублікі Беларусь, які ўзгадніў яго кандыдатуру на пасаду старшыні Бешанковіцкага райвыканкама, і паабяцаў, што паспрабуе выканаць усе наказы. Першае, што неабходна, да 20 жніўня якасна завяршыць у раёне ўборачную кампанію. Акрамя гэтага, трэба ўзяць пад кантроль праблемныя прадпрыемствы, прадумаць, як прыцягваць і замацоўваць маладых спецыялістаў, прааналізаваць перспектыўныя напрамкі развіцця бізнесу не толькі ў Бешанковічах, але і аграгарадках раёна. Таксама Андрэй Булаўкін сказаў, што будзе надаваць больш увагі ЖКГ – якасці паслуг, што аказваюцца, а таксама навядзенню парадку на зямлі.
Даведка «ВВ»
Андрэй Анатольевіч Булаўкін нарадзіўся 30 ліпеня 1979 года ў Оршы. Працоўную дзейнасць пачаў у 1999-м брыгадзірам у калгасе ім.Заслонава, дзе потым працаваў аграномам-аграхімікам. У 2001-м такую ж пасаду заняў на УСХП «Забалацце» і дайшоў да галоўнага агранома. З 2007 па 2009-ы быў старшынёй СВК «Росскі селец». З 2009-га працуе ў Бешанковіцкім раёне. Да новага прызначэння працаваў намеснікам начальніка ўпраўлення сельскай гаспадаркі і харчавання райвыканкама. Дэпутат раённага Савета дэпутатаў.
Алена АЛІМАВА, фота аўтара. "Віцебскія весці".