У Бешанковічах прайшоў абласны чэмпіянат «Лесаруб – 2017»
Больш за 70 найлепшых лесарубаў з 19 лясгасаў Віцебшчыны сабраліся ў Бешанковічах, каб спаборнічаць у майстэрстве валкі лесу і чатырох стэндавых практыкаваннях: мантажы ланцуга бензапілы, дакладным пілаванні, раскряжоўцы камбінаваным рэзам і абрэзцы сучкоў. Завяршала праграму эстафета. На ўсіх этапах улічваліся дакладнасць, якасць і хуткасць, выкананне ўсіх тэхнічных параметраў і правілаў бяспекі.
У складзе кожнай лясной дружыны былі як доследныя майстры, так і юніёры не старэйшыя за 24 гады. Тон конкурсу задавала зборная Міністэрства лясной гаспадаркі Рэспублікі Беларусь, якая заняла ў 2016-м 1-е месца ў сусветным чэмпіянаце вальшчыкаў лесу, які праходзіць адзін раз на два гады.
– Абласныя спаборніцтвы – як падвядзенне вынікаў, чаму навучыліся і што ўдасканалілі за год, – сказаў галоўны суддзя чэмпіянату, начальнік бюро па ахове працы Віцебскага ДВАЛХ Віктар Бароўка.
Пасля жараб'ёўкі каманды разбіліся на дзве групы: адны адправіліся на стэндавыя выпрабаванні, іншыя – на лесасеку.
Для валкі лесу выбіраліся дрэвы дыяметрам 28-32 см, каб усе ўдзельнікі знаходзіліся ў роўным становішчы. Пры гэтым узрост сасны павінен быць не менш за 80 гадоў – больш малады лес секчы забаронена.
– Перад тым як спілаваць дрэва, трэба папрасіць у яго прабачэння і мысленна ўказаць яму патрэбны кірунак падзення, а папярэдне расчысціць для яго пляцоўку, каб яму было мякка падаць, – падзяліўся суддзя Ігар Касцюк з Бегомльскага лясгаса, які сам не раз быў лідарам такіх спаборніцтваў, у тым ліку на міжнародным узроўні.
Удзельнікам трэба было паваліць дрэва прама на калок, усталяваны ў 15 метрах ад асновы. За дакладнае траплянне і бездакорны спіл – 660 ачкоў. Кожны сантыметр адхілення аднімаў 1 ачко.
– Каб дрэва не пайшло ў бок, павінен застацца недапіл, а каб гэтая махіна падала паступова, вугал падпілу павінен быць 45 – 50 градусаў, – растлумачыў Ігар Мікалаевіч.
Па суме балаў пасля ўсіх практыкаванняў выявіліся лідары ў асабістым заліку. Усе – прадстаўнікі Бегамльскага лясгаса: 1-е месца ў Аляксандра Бобрыка, 2-е ў Аляксандра Юковіча, 3-е ў Уладзіміра Гнусіна. Юніёр Віталь Пашкоўскі з гэтай жа каманды таксама стаў пераможцам у сваёй групе. Нядзіўна, што агульнакаманднае першае месца дасталася Бегамльскаму лясгасу, другое – глыбчанам, а на трэцяе выйшла каманда вальшчыкаў Пастаўскага лясгаса.
– Гэта спаборніцтва, якое прайшло на нашай тэрыторыі, падштурхнула вальшчыкаў лесу Бешанковіцкага раёна да павышэння свайго прафесійнага ўзроўню і паставіла мэту – у будучыні стаць чэмпіёнамі, – адзначыў галоўны ляснічы Бешанковіцкага лясгаса Мікалай Серабро.
Алена АЛІМАВА, фота аўтара. "Віцебскія весці".