У Браславе будуць развіваць парусны спорт

Браслаўскі раён асацыюецца, у першую чаргу, з цудоўнымі азёрамі і месцамі для адпачынку, якія папулярныя не толькі ў беларусаў, але і ў замежных гасцей. У апошнія гады Браслаў становіцца ўлюбёным месцам і для прыхільнікаў паруснага спорту. Прыродны ландшафт раёна ідэальна падыходзіць для развіцця яхтынгу. Справа за эфектыўнай рэкламай, энтузіястамі і інвестарамі.

Зусім нядаўна Браслаў наведалі адміністрацыя польскага горада Легіёнава і старшыня грамадскага аб'яднання «Саюз Браслаўлян» Уладзіслаў Краўчук, які дзейнічае ў Варшаве. Адзначым, што пры актыўным удзеле «Саюза Браслаўлян», які аб'ядноўвае выхадцаў з Браслава, што пражываюць у Польшчы, у Віцебскай вобласці рэгулярна рэалізуюцца праекты ў сферы культуры, адукацыі, спорту і турызму. У ходзе візіту абмяркоўваліся перспектывы далейшага развіцця яхтынгу на Браслаўшчыне.

Уладзіслаў Краўчук паведаміў, што ў цяперашні час прапрацоўваецца пытанне стварэння ў Браслаўскім раёне структуры, якая аб'ядноўвае спартсменаў і аматараў яхтынгу з Польшчы, Латвіі і Беларусі. Польскі бок мае намер і ў далейшым аказваць садзейнічанне па пытаннях набыцця яхт і падрыхтоўкі інструктараў паруснага спорту, якіх у Беларусі пакуль не так шмат.

На думку Уладзіслава, прыродныя і турыстычныя вартасці Браслаўскага раёна не ў поўнай меры даследаваны замежнікамі, якія пражываюць у суседніх краінах. Для выпраўлення сітуацыі неабходна актыўная праца па распаўсюджванні інфармацыі аб перавагах Браслава як турыстычнага і спартыўнага цэнтра.

Намеснік начальніка аддзела адукацыі, спорту і турызму Браслаўскага раённага выканаўчага камітэта Людміла Іванаўна Шукель расказала польскім гасцям пра гісторыю развіцця яхтынгу на Браслаўшчыне. Першыя яхт-клубы з'явіліся на возеры Дрывяты яшчэ ў канцы 20-х гадоў мінулага стагоддзя. Развіццю гэтага віду спорту перашкодзіла Другая сусветная вайна і складаная пасляваенная сітуацыя. У 2012 годзе, пасля працяглага перапынку, на Браслаўшчыне адбыліся першыя спаборніцтвы яхт класа «Мікра», якія з цягам часу сталі традыцыйнымі. У 2014 годзе, акрамя паруснікаў класа «Мікра», у рэгаце прынялі ўдзел яхты класа «Аптыміст». Характэрна, што ў 2013 годзе ў спаборніцтвах узялі ўдзел 8 каманд, а годам пазней колькасць каманд узрасла да 54. Сёлета рэгата адбудзецца 21-23 жніўня і абяцае быць не менш маштабнай.

Максім Петранка, Партал gorodvitebsk.by