У Браславе прайшла рабочая сустрэча кіраўнікоў памежных ведамстваў Беларусі і Латвіі
Старшыня Дзяржпамежкамітэта Беларусі Леанід Мальцаў
і начальнік Дзяржаўнай памежнай аховы МУС Латвіі Нармундс Гарбарс
абмеркавалі пытанні ўзаемадзеяння паміж памежнымі ведамствамі дзвюх краін. У
выніку былі вызначаны напрамкі далейшага супрацоўніцтва і падпісана
міжведамаснае палажэнне, якое рэгламентуе некаторыя моманты двухбаковых
расследаванняў памежных інцыдэнтаў.
Як паведамілі ў прэс-службе Полацкага
пагранатрада, акрамя гэтага, госці азнаёміліся з інфраструктурай органаў
памежнай службы, тэхнічнымі сродкамі аховы мяжы і ўзбраеннем
ваеннаслужачых, пабываўшы на памежнай заставе «Плюсы», якая кантралюе
трыццацікіламетровы ўчастак мяжы з Латвіяй. Таксама ў дэлегацый была
магчымасць наведаць аўтадарожны пункт пропуску «Грыгораўшчына» ў
Верхнядзвінскім раёне, рэканструкцыя якога завяршылася ў мінулым годзе.
Цяпер у асноўным калідоры на беларуска-латвійскай мяжы выкарыстоўваюцца
сучасныя тэхналогіі, якія дазволілі ўдасканаліць працу ўсіх задзейнічаных службаў,
у чым прадстаўнікі дэлегацый дзвюх краін змаглі пераканацца асабіста.
Вольга Маслоўская, "Віцебскія весці".