У Браслаўскім раёне ўшанавалі першага ў краіне камбайнера-двухтысячніка

Перадавік жніва працуе на палях ААТ "Бярозавы край" Браслаўскага раёна, якое ўваходзіць у склад Глыбоцкай інтэграцыйнай структуры. Камбайнер Сяргей Зелянкевіч першым у краіне намалаціў 2 тыс. т збожжа. З гэтым дасягненнем аграрыя павіншаваў старшыня Віцебскага аблвыканкама Мікалай Шарстнёў, кіраўнік Браслаўскага раёна Аляксандр Баданін і генеральны дырэктар ААТ "Глыбоцкі камбікормавы завод" Алег Скрабнеўскі. Яны ўручылі перадавіку грамату, падарункі і грашовую прэмію.

У сельскай гаспадарцы Сяргей Зелянкевіч працуе 10 гадоў, працуе на Глыбоцкім камбікормавым заводзе. Цяпер прыкамандзіраваны на час жніва ў Браслаўскі раён. "У дзяцінстве працаваў з дзядзькам, быў памочнікам на камбайне "Палессе". Сельская гаспадарка зацікавіла, пазней самастойна працаваў на "Палессе", цяпер далі замежную тэхніку. Галоўнае, каб надвор'е было добрае", - сказаў Сяргей Зелянкевіч.

Заходнія раёны Віцебскай вобласці больш за ўсё пацярпелі ад спёкі, але за кошт цэнтральных і ўсходніх рэгіёнаў плануецца кампенсаваць недахоп. Ураджай чакаецца значна вышэй за ўзровень мінулага года. "Гэта гістарычны момант, каб на Віцебшчыне, а не ў больш цёплых рэгіёнах першым у краіне з'явіўся двухтысячнік. Калі надвор'е дазволіць сабраць усё выраслае, то не выключана, што ў нас будзе рэкордны валавы збор. Але галоўнае тут тэхналогія. Калі яна вытрымана, то незалежна ад надвор'я атрымаеш максімальны ўраджай", - адзначыў кіраўнік вобласці Мікалай Шарстнёў. Ён пажадаў перадавіку не зніжаць тэмп і трымацца ў лідарах уборачнай кампаніі.

Кіраўнік ААТ "Бярозавы край" Андрэй Мацук распавёў, што цяпер на палях гаспадаркі працуюць дзевяць камбайнаў, у бліжэйшы час далучацца яшчэ тры. Усяго сабрана каля 30% плошчаў. "Ураджайнасць складае 39 ц/га, з прычыны засухі (выпала ўсяго 7%(ападкаў ад нормы) гэта добры вынік. Па тэхналогіях спрацавалі добра, правялі своечасова падкормку і хімапрацоўку", - дадаў дырэктар.

Усяго ў Віцебскай вобласці збожжавыя і зернебабовыя культуры трэба ўбраць на плошчы 354 тыс. га. Цяпер убрана больш за 5% плошчаў.

БЕЛТА. Фота БЕЛТА і газеты "Віцебскія весці".