У чым можа праяўляцца дзяржаўна-прыватнае партнёрства ў Віцебскай вобласці?
Сумеснае пасяджэнне прэзідыума абласнога Савета дэпутатаў і абласнога саюза наймальнікаў было прысвечана тэме перспектыў дзяржаўна-прыватнага партнёрства.
Як паведаміў старшыня абласнога Савета дэпутатаў Аляксандр Ацясаў, такая сістэма супрацоўніцтва ўлады і бізнесу – распаўсюджаная сусветная практыка, у апошнія гады яе пачалі выкарыстоўваць некаторыя краіны постсавецкай прасторы. З гэтага года да іх далучаецца і Беларусь: у Палаце прадстаўнікоў Нацыянальнага сходу прайшлі адпаведныя парламенцкія слуханні, і рыхтуецца законапраект аб дзяржаўна-прыватным партнёрстве, які нацэлены на вырашэнне праблемных пытанняў сумеснымі намаганнямі, аб'яднанне інтарэсаў дзяржавы і прыватнага сектара. Бізнес больш гнуткі і мабільны ў параўнанні з дзяржаўнымі прадпрыемствамі, ён валодае эфектыўнай сістэмай кіравання і менеджментам. Прапанаванае партнёрства дазволіць яму ўвайсці ў галіны, дзе прадстаўлена ў асноўным дзяржаўная ўласнасць, гэта значыць дапаможа вырашаць задачы сацыяльнай сферы. Са свайго боку дзяржава павінна прадаставіць падатковыя льготы, спрасціць перадачу зямлі і арэндныя адносіны, прапрацоўваюцца і іншыя эфектыўныя механізмы.
– Прыкладамі партнёрства могуць быць прыватныя дзіцячыя сады, школы, установы аховы здароўя. Але ў першую чаргу бачым удзел бізнесу ў абслугоўванні жыллёва-камунальнай гаспадаркі, будаўніцтве дарог, рэалізацыі экалагічных праектаў, лагістыцы і турызме. Мы павінны выкарыстоўваць перавагу абедзвюх форм уласнасці, аб'яднаць іх моцныя бакі для вырашэння канкрэтных задач, – адзначыў Аляксандр Ягоравіч. Свой меркаванне па дадзенай тэме выказалі і ўдзельнікі сумеснага пасяджэння – кіраўнікі найбуйнейшых прадпрыемстваў вобласці.
Таксама на пасяджэнні былі ўзнагароджаны пераможцы штогадовых конкурсаў «Найлепшы кіраўнік» і «Найлепшы канструктар», арганізатарам якіх выступае саюз наймальнікаў. Адзін з тых, хто ў гэты дзень атрымаў узнагароду, – дырэктар віцебскага ААТ «Малако» Аляксандр Лукінаў. У няпростых фінансавых умовах прадпрыемству ўдалося дасягнуць добрых эканамічных вынікаў і атрымаць Прэмію ўрада за дасягненні ў галіне якасці.
– Адзначаюць кіраўніка, але, я лічу, гэта заслуга ўсяго калектыву. Поспех не прыходзіць выпадкова, мы ставім канкрэтныя задачы і іх вырашаем, увесь час працуючы над якасцю, асартыментам, тэхналогіямі, – расказаў Аляксандр Лукінаў.
Вольга Маслоўская, "Віцебскія весці"