У Дзень Канстытуцыі Рэспублікі Беларусь юным грамадзянам уручылі пашпарты

Па традыцыі напярэдадні і непасрэдна ў Дзень Канстытуцыі Рэспублікі Беларусь у рамках Усебеларускай акцыі «Мы — грамадзяне Беларусі!» маладыя людзі становяцца ўладальнікамі свайго галоўнага дакумента. Сёння на Віцебшчыне ва ўрачыстай абстаноўцы выдатнікам вучобы, актывістам грамадскай дзейнасці і спартыўнага жыцця пашпарты ўручаюць прадстаўнікі заканадаўчай і выканаўчай улады, грамадскія дзеячы.

 Для Вольгі Казакевіч (на фота) уручэнне галоўнага дакумента грамадзяніна краіны стала адным з самых яркіх уражанняў. Напярэдадні Дня Канстытуцыі чатырнаццацігадовая вучаніца сярэдняй школы №12 Віцебска апынулася ў ліку тых 27 рабят з усёй рэспублікі, якія атрымалі пашпарты ў Музеі сучаснай беларускай дзяржаўнасці ў Мінску. Цырымонія праходзіла з удзелам намесніка кіраўніка Адміністрацыі Прэзідэнта Рэспублікі Беларусь Ігара Бузоўскага і першага сакратара ЦК БРСМ Андрэя Белякова, якія павіншавалі школьнікаў і адзначылі, што цяпер маладыя людзі становяцца паўнапраўнымі грамадзянамі сваёй дзяржавы.

Вольга прадстаўляла Віцебшчыну ў гэтай цырымоніі не выпадкова. Яна актыўная ўдзельніца раённых навукова-практычных канферэнцый па сусветнай гісторыі, зборнага валанцёрскага атрада Першамайскага РК БРСМ «З дабром», займаецца ў студыі сцэнічнага майстэрства «Арт-праект» Канцэртнай залы «Віцебск», ужо паспела паспрабаваць сілы ў Міжнародным конкурсе-фестывалі дзяцей і моладзі «Неўскія перспектывы», праявіць сябе ў адукацыйным праекце сучаснага мастацтва і крэатыўнай творчасці «Апельсінавыя бярозы» ў Маскве, Міжнародным конкурсе дзіцячага

творчасці «Скрыжаванне-2015». А колькі дарог яшчэ наперадзе!

Усяго ж ад Прыдзвіння, як паведамілі ў абласным камітэце БРСМ, на мерапрыемстве прысутнічалі чацвёра выдатнікаў і актывістаў. Акрамя Вольгі, гэта Мікіта Бякіш з Дзеркаўшчынскай СШ Глыбоцкага раёна, Вера Аднарогая з Сянненскай СШ №1 імя З. Азгура і Дар'я Семянкова, навучэнка Даўжанскай СШ Віцебскага раёна. На памяць яны атрымалі маляўніча аформлены альбом «Я – грамадзянін Рэспублікі Беларусь», а пасля ўрачыстай цырымоніі для юнакоў і дзяўчат была арганізавана экскурсія па музеі.

Чаму гэтая акцыя, якая стала добрай традыцыяй, важная для рабят? Таму што яна дае ім магчымасць адчуць сябе датычнымі да лёсу сваёй краіны, адчуць адказнасць за яе будучыню.

Вольга МАСЛОЎСКАЯ. Фота Антона СЦЕПАНІШЧАВА. «Віцебскія весці».